Saiha district-a IMR san chhan pakhat - Damdawi-in ni loa nau nei la tam vang
National Institute of Cholera and Entric Diseases (NICED), ICMR, Kolkata-a mithiamte chuan tun hnai khan Saiha district-a infant mortality rate (IMR) sàn chhan a hmunah an zir chiang a; IMR san an hmuhchhuah zinga a chhan lian tak pakhat chu - damdawi-in ni loa nau nei an la tam vang tih a ni.
Rajya Sabha MP, Ronald Sapa Tlau-in Union Health Minister a ngenna angin ICMR-a mithiam pathum - Dr Samiran Panda (scientist-F), Dr Shanta Dutta (scientist-G) leh Dr Alok K Deb (Scientist-E) te chuan April thla khan Saiha district-a IMR san chhan leh Mizorama cancer dinhmunte an rawn zir chiang a ni.
ICMR team tho, Delhi leh Mumbai-a mithiamte - Dr Malabika Roy (scientist-G), Dr Sanjay Chauhan (scientist-F), Dr Veena Singh (scientist-G) leh Dr Aditya Parashari (scientist-C)-te chuan Mizorama cancer zir chiang tur leh cancer do dan tur ngaihvenin Mizoramah an rawn kal a; Mizorama doctor-te tan traning leh workshop an buatsaih.
Cancer zir chiangtu ICMR team-te hian Aizawl Civil Hospital, State Referral Hospital leh Saiha District Hospital-ahte chhûl cancer hmuhchhuahna khawl - AV Magnivisualiser an pe a, doctor-te chu a hman dan an zirtir nghal a ni. AV Magnivisualiser hi district hospital dangah pawh pek an tum thu an sawi a; Mizoram doctor-te nen cancer chungchanga research neih leh zui an tum tuh an sawi bawk.
