Covid-19: Mizoram dinhmun Hri vei hmuh chhuah tharte Mizoram chhunga kái vek

October 21, Nilaini khan Mizoramah Covid-19 vei mi 31 hmuh belh a ni a, Mizo­rama hripui vei hmuh chhuah tawh zawng zawng chu mi 2,341 an ni. Nimin khan hripui laka fihlim tawh mi pakhat chhuahtir a ni thung.

Nilainia hmuh chhuah Covid-19 positive-te chu mipa 15 leh hmeichhia 16 an ni a; ZMC laboratory-a hmuh chhuah pasarih, TrueNAT-PCR hmanga Lungleia hmuh pahnih leh Serchhipa hmuh pakhat, RAT hmanga Aizawl khawpuia hmuh chhuah mi 21 an ni.

Nimin khan Covid-19 vei vanga enkawl zinga negative tawh mi pakhat chu chhuahtir a ni a; SRH-ZMC aṭanga chhuahtir a ni.

Mizorama Covid-19 positive hmuh chhuah tawh mi 2,341-te chu mipa 1,887 leh hmeichhia 454 an ni. An zinga mi 2,175 (92.91%) chu chhuahtir an ni tawh a, enkawl mek mi 166 (7.09%) an awm. La chhuak lo zingah negative tawh an awm nual bawk.

October 21, Nilaini khan ZMC laboratory-ah swab sample 562, True­NAT-PCR hmangin district pariatah sample 207 leh RAT hmangin district pakuaah sample 991 endik a ni a, a vaiin sample 1,760 a ni.

October 21, Nilainia Covid-19 vei ZMC laboratory-a hmuh chhuahte chu mipa pakhat leh hmeichhia paruk an ni a, hmeichhe naupang kum 5 mi a tel. Mizoram chhunga kái chhâwng vek ni mah se, Covid-19 symptom nei an awm lo a, mahni ina inkhung lai vek an ni.

Sorkar thuchhuaha a lan danin, ZMC-a hmuh chhuahte chu Chaltlang venga hmeichhia panga, kum 5, 18, 37, 43 leh 70 mi te, Tuikual South-a mipa kum 38 mi leh, Zarkawt venga hmeichhia kum 58-a upate an ni. Tuikual South-a mi hi symptom nei loa tarlan a nih laiin, symptom a neih vanga endik a nih thu, an veng aṭanga thu dawnna chuan a sawi.

TrueNAT-PCR hmangin Lunglei Civil Hospital-ah hripui vei mi pahnih hmuh chhuah a ni a; Lunglei Venglaia mi ve ve, mipa kum 76 leh hmeichhia kum 21 an ni. Mizorama kai an ni a, an ina inkhung lai niin, symptom an nei lo. Serchhip Chanmari Vengah pawh a hmaa hmuh tawhte aṭanga kái hmeichhia kum 48 mi hmuh belh leh a ni bawk.

RAT hmangin Aizawlah Covid-19 positive mi 21 hmuh chhuah a ni a, mipa 13 leh hmeichhia 8 niin, Aizawl tualchhunga kái vek an ni.

RAT hmanga hmuh chhuahte chu Ebenezer School Hostel, Zemabawka awm warden mipa kum 30 leh zirlai mipa panga leh hmeichhia pathum an ni a; zirlaite chu kum 15 leh 16 mi vek an ni. Mi paruk chu Zemabawk mi an ni a, Zemabawk North mi pahnih leh Zemabawk Vengthar mi pakhat an awm.

School hostel-a mite bakah Zema­bawk veng mi pahnih - mipa kum 16 leh hmeichhia kum 25 leh, Zemabawk Vengthara mi mipa kum 29-a upa hmuh chhuah a ni.

Chanmari vengah mi pathum, mipa kum 53 leh hmeichhia kum 16 leh 23 mi hmuh chhuah a ni a; Durtlang Leitan vengah pawh hmeichhia pahnih, kum 31 leh 78 hmuh a ni. Hri an kaina chhui mek niin, symptoms an nei ve ve a ni.

Veng dang pali-ah pakhat ṭheuh - Armed Veng mi mipa kum 60, Dawrpui venga mi mipa kum 17, Laipuitlang mi mipa kum 16 leh, Ramhlun Venglaia mipa kum 23 mi hripui vei hmuh chhuah a ni bawk.