Card vara ration buhfai lak man chiah tihsàn a ni - FCSCA

Food, Civil Supplies & Consumer Affairs (FCSCA) department chuan October, 2024 aṭanga ration card var (Non-NFSA) neite buhfai lakna man tihsàn chungchangah mipui lamah hriat chian loh a awm theih avangin hriattirna a tichhuak a; card var hmanga ration buhfai lak man chauh tihsàn a nih thu a tarlang.

FCSCA department hotute chuan, October 2024 aṭanga ration card var neite ration lak man tihsàn chuan card dang (car eng leh card pawl) a tibuai lo tih an tarlang a, "Tun hnaia card var man a san avanga card pawla additional kg. 3 lak man a sang ve anga sawi an awm. NFSA hnuaia AAY beneficiary-in kg. 35 leh PHH beneficiary tinin kg. 5 a thlawna an dawn baka PHH card neite'n kg. 3 an dawn belh hi a rate ngai kg. khatah Rs 15 a la ni reng," an ti.

FCSCA DEPARTMENT TARLANTE

■ October, 2024 ration sem aṭangin card var neite'n kg. khat Rs 30 zelin an la ang.

■ Buhfai man tihsàn hi Mizoram pumah hman nghal tur a ni.

■ Ration card pawl (PHH) neite'n additional kg. 3 an lâk ṭhin chu a man pangngai, kg. khat Rs 15 zelin an la ang.

■ Ration card eng leh pawl ennawn (NFSA beneficiary revision) neih mek zawh a la nih loh avangin October, 2024 thla hi tuna ration card an neih lai mek angin ration buhfai an la ang.

■ Thupek ding lai angin retailer-te'n mipuiah buhfai bûk tling ngei an pek theih nan Supply kudam aṭangin bûk tling ngeiin buhfai an phur chhuak tur a ni.