CS Renu Sharma thlah

October 2024 thla tawpa Superanuation pension-a chhuak tur chief secretary Dr Renu Sharma chu nimin khan Political & Cabinet department, Vigilance department leh Anti Corruption Bureau (ACB)-a thawkte'n CS conference hall-ah an thlah.

Chief secretary Renu Sharma thlahnaah hian Vigilance secretary Betsy Zothanpari Sailo, Political & Cabinet additional secretary R Lalmuankimi leh ACB director Rodingliana Chawngthu ten thlahna thilpek an hlan a ni.

Sorkar laipuia Ministry of Home Affairs chuan October 28, 2021 khan Mizoram chief secretary atan Dr Renu Sharma, IAS ruatna a tichhuak a; November 2, 2021-ah Mizoram chief secretary atan lak luh niin, October 31, 2021-a chhuak Lalnunmawia Chuaungo a thlak.

Dr Renu Sharma hi IAS 1988 batch niin, Arunachal Pradesh, Goa, Mizoram and Union Territory (AGMUT) cadre a ni a, chief secretary a nih hma hian Mizoramah ṭum hnih a lo thawk tawh a ni.

Renu Sharma chhuah huna Mizoram chief secretary tur ruat a la ni lo a; chief minister Lalduhoma chuan chief secretary atan Prime Minister leh Home Minister hnenah Vumlunmang Vualnam, IAS an dil thu a lo sawi tawh a ni.