Chetsualnaah mi pahnih an thi

October 27, Pathianni khan chêtsualna avangin mi pahnih an thi a, pakhat chu tuia tla hlum niin, pakhat chu bike-a chesual a ni.

Pathianni chhun dar 1 vel khan Jerry Lalrinchhana (40), Melthum chu a ṭhiante nena Tlawng luia an kalnaah Phunchawng lí-ah chesualin tuiah a tla a, a chetsual aṭanga darkar 1:30 vel hnuah a tlakna líah a ruang hmuh a ni.

Jerry-a chetsualna hmun hi kea darkar 3 vel kal a ni a, Samlukhai khaw mite'n motor awmna thleng an zâwn a; Samlukhaiah thlahna hun hman a nih hnuah Melthum panpui niin, nimin khan vui a ni.

Pathianni zing khan Phillip Lalramhluna (22) s/o Lalthanruala, Khawlian chu Zemabawkah bike-in a chesual a, damdawi-in panpui a nih laiin a hliam tuar loin a thi. A ruang hi an khuaah lak a ni a, nimin khan vui a ni.