Hmingṭhat tum vang leh RAT hman vangin hri a darh - MPCC
Mizoram Pradesh Congress Committee (MPCC) chuan thuchhuah siamin, tun hnaia Covid-19 vei an pun thar leh tâk vak chhan chu - sorkarin hmingṭhat a tum avanga dam chiang loa positive tam tak chhuahtir an nih vang leh, swab test nana rintlak tâwk loh Rapid Antigen Test (RAT) a hman luih tlat vang nia an ngaih thu an tarlang.
Mizoram sorkarin Covid-19 chungchangah hmingṭhat an duh avangin sawisel hlawh RAT an hmang lui tlat tih sawiin MPCC chuan, "A tam thei ang ber chhuahtir tumin hma an la a, Covid-19 enkawl kawnga che ṭha ber anga inlantir a, mipui laka hmingṭhat chu an tum ber a ni. Positive-te test nawn nan rintlak ber RT-PCR hmang loin, RAT an hmang lui a, positive tam tak dam chiang loin an chhuah niin a lang. Hei hi tun hnaia Covid-19 vei kan pun leh hluai chhan dik takah kan ngai," an ti.
Congress party chuan, Covid-19 chu a tìr aṭangin MNF sorkarin politics khelhna hmanruaah an hmang nia sawiin, "RT-PCR dahna tur laboratory
din chungchangah thu dik tâwk lo mipui hrilhin, fak an hlawh theihna tur zawngin hma an la a, tunah a pawizia a lang ta," an ti a; October 4, 2020-a Health minister Dr R Lalthangliana'n hripui inkài chhàwnna chhut chah a nih tawh thu a sawi chu a dik lohzia tunah a lang chiang ta tih an sawi.
MNF sorkar leh Health Minister-te chu politics khelhna atan Covid-19 hripui léng hmang tawh lo tura chahin MPCC chuan, "Hmingṭhat ringawt tuma lemchan bànsanin, politics aiin mipui hriselna dinhmun tak tak ngaihtuah zawk rawh se," an ti.
MPCC tarlan danin, tun hnaiah hripui vei an pung leh nasa a; ni thum chhungin hripui vei mi 88 hmuh chhuah a ni. An zinga a tam zawk chu civil mi an ni a, symptom nei tam tak an awm bakah, ICU-a enkawl ngai eng emaw zat an awm a, kàina hriat theih loh tam tak an awm bawk.
Covid-19 kaihhnawiha swab sample endikna atana rintlak bera khawvelin a ngaih chu RT-PCR a ni a, 100%-in dik vek bik lo mah se, rintlak bera ngaih a ni. Mizorama hman lâr tak RAT erawh chu a rintlak tawk lohzia mithiamte'n an sawi nasa hle a ni.