KHAWTHLIR

Diwali pualin hawng dawn

Governor chenna Raj Bhavan chu Diwali (October 31) khian tlai dar 4 aṭanga zan dar 7 thleng mipui tlawh theiha hawn a ni dawn tih sorkar thuchhuahin a tarlang. Raj Bhavan tlawh duh tan hmar lam gate, Assembly House bul aṭanga luh leh chhuah tur a ni.

CCM pisa hawng

Council of Churches in Mizoram (CCM) pisa thar chu nimin zing khan CCM president Rev. Dr R Lalbiakliana'n hawngin Pathian hnenah a hlan. CCM hi October 27, Pathianni khan hawn a ni a, pisa hi Synod Conference Centre-ah a awm. Pisaah hian CCM general secretary Rev. Dr Lalhmangaiha bakah, office assistant, peon leh driver pakhat ṭheuh an thawk a ni.

Saitual DAMC

Saitual bawrhsap Dr Lalngura Tlau kaihhruaiin nimin khan DC conference hall-ah District Agricultural Marketing Committee an ṭhu a, hmalak dan tur an sawiho. Dr Lalngura Tlau chuan, sorkar policy ngai pawimawh thar turin kal khawmte a chah a, "Kumtluana rim taka thawktute'n dik takin hlâwkna tel ngei se ka duh a, chumi tur chuan ṭan lakpuiah ka sawm che u a ni," a ti.

Chêt lâk dan zirho

Hnahthial bawrhsap Rita Lalnunmawii Pachuau kaihhruaiin nimin khan tuilian leh leimin thlen thulha chêt lâk dan tur zirhona, 'Mock Exercise on Flood and Landslide Disaster in Mizoram' kalpui dan tur sorkar hotute leh khawtlang leh tlawmngai pawl hruaitute'n an rêl. Chhiatna thlen palha ruang leh hliam tuar zâwn chhuah dan tur te, inrálrinna (warning) inpek dan tur te, a kaihhnawih department leh VC, quick response team leh YMA-te mawhphurhna sawiho a ni.

Thisen pe

Mizo Indian Reserved Police 3rd Battalion chuan Police Commemoration Day 2024 pualin nimin khan Thingkaha an hmunah thisen pek an huaihawt a, Lawngtlai District Hospital tan thisen unit 19 an pe. 3rd IR polidce hian Police Commemoration Day pualin cleanliness drive leh tree plantation huaihawt leh an tum bawk.