Tuialhtheia chhiah tihpun mi rethei zawkte rawkna a ni - R Lalthangliana

MNF senior vice president Dr R Lalthangliana chuan Sinlung Hills Council inthlanpui atan nimin khan North Chawnpui, Saipûm, Saiphai, Phainuam, Saihapui-V leh Bilkhawthlir khuaahte a campaign a; tuialhtheia chhiah tihpun chu mirethei zawkte rawkna leh ZPM party mi leh sate inhaivûrna niin a sawi.

Dr R Lalthangliana chuan, sorkarin tuialhthei man a tihsan chu MNF-in a do hrim hrim lo nia sawiin, a punna a tam thu leh inthlan campaign laia chhiah tihpun loh sawi fo ṭhinte'n mipui an bumna a nih thu a sawi a, "Chhiah chi hrang hrang an tihpunte hi mirethei zawkte rawkna leh anmahni party mi leh sate inhaivûrna a ni," a ti.

MNF Senior Vice President chuan, thil man a to tawh chuan a tlahniam tawh ngai lo nia sawiin, "Tuna thil man to hian khawsak harsa zawkte a la nghawng dawn chauh a, lirthei chuan man leh sa man thlengin a la rawn to zel dawn a, a pawi khawp mai," a ti. Tuialhthei man tihsan avangin mipui ni tin mamawh leh dailuah, tél, alu, tomato, bekang sa, chana, atta, zikhlum, purûn, badam leh cement mante a pung nasa niin a sawi.

Dr R Lalthangliana chuan, SHC inthlanpuiah MNF candidate-te vote turin mipui a ngen a; MNF an thlan tlin chuan an tih fuh tur thu a sawi a ni.