Kuhva tawlh doah sorkarin thâ thla a tum lo; Siamṭhat hna kan thawk hnem - Home Minister

Home minister K Sapdanga chuan nimin khan ZPM pisaa chhung inkhawmah thu sawiin, thla 10 an sorkar tawh chhungin siamṭhat hna an thawh hnem thu leh kuhva rah tawlhruk do kawngah thâ an thlah dawn loh thu a sawi.

K Sapdanga chuan, sorkar thar a pian aṭangin inchibaina hun a awm lo tih sawiin, "Chief Minister-in ni 100 chhunga thawh zawh tur programme a siam a, a ni khatna aṭangin tuthlawh kan hûm nghal. Hna thawk chunga kan hna pui ber pakhat chu mipui bum tuma dâwt phuahchawptute dâwt sawi hrilhfiah leh sorkar chhunga a chhe lai siamṭhat a ni. Nehemia'n kut lehlamin rál a do a, a lehlamin kulh bang chhia a siamṭha ang kha kan ni," a ti.

Thla 10 chhungin siamṭhat hna an thawh tam thu sawiin Sapdanga chuan, "Ka chan ve lamah ringawt pawh check gate-a kutkem nei tihbo, police fitness tihpun, aikal tihbo, office hunbi vawn, black money siamtu leh tualchhunga kuhva chingtute harsatna siamsaktu foreign kuhva dote kan thawk," a ti a; ram dang kuhva chu sorkar hmasa hun laiin zung a inkaih thûk tawh avangin chawp leh chilha tihreh a har thu a sawi.

K Sapdanga chuan, kuhva tawlh tibo turin theihtawp an chhuah mek thu sawiin, "Thâ kan thlah dawn lo. Pathian zarah hlawhtlinna kan la hmuh ngei kan beisei. Kuhva tawlh hian kan ram chhunga kuhva chingtute eizawnna a tihchhiat bakah black money a tipung a, zirlaite hmakhua a tihchhiat bakah, in hmun lo ram a ti to em em. Chuvang chuan dan loa kuhva tawlh donaah sorkarin thâ a thlah dawn lo," a ti.

Home Minister chuan, sorkarna an chelh hnu lawkah sorkar laipuiah BJP leh an thurualpuite sorkar inṭâwm a din tâk avangin tun thlengin state hrang hrangte sum hmuh tur sem chhuah a muang tih sawiin, "Hei hian keini state pawh min nghawng na hle. Loh theih loa sum pûk a ngai a, kan pûkte hi kan pe leh nghal zel. Eptu party lam chuan kan pek sawi duh loin kan pûk ringawt an tlangaupui duh a ni," a ti a, sorkar laipui chak tâwk loh avangin beisei angin hma an lak theih loh thu a sawi.

K Sapdanga chuan, Assam Rifles insawn chhuah chungchang chu sorkar kal tawhte'n ti thei bik tura an insawina leh politics khelhna atana an hman ṭhin a nih thu sawiin, "Theihtawp chhuaha kan CM hmalakna Pathianin mal a sawm a, tunah chuan AR insawn chhuahna tur thuthlung kan ziak thei ta. Hetih lai hian, an sorkar laia sawn chhuak chak em emtu party lam chuan sawn chhuah an hlau leh lawi si a, thil mak tak a ni," a ti.

Sinlung Hills Council inthlan lo awm turah HPC-te nen an thawhona a ṭhat thu sawiin Sapdanga chuan, "Campaign hawn ni aṭangin party hruaitute kan feh chhuak sang sang a, kan thawhrimzia leh ram siam kan tumzia hriain hmar lama unaute pawhin eptu party lama ṭan an tum lo niin kan hria," a ti. VC inthlan awm leh turah pawh an chak ngei theih nan sorkar nena inhne rem tak VC an neih theih nan ṭan la turin ZPM block leh unit-te a sâwm bawk.