PMAY-G hnuaiah 78.82%-in in sa zo tawh; Lunglei dist-ah in sa zo percentage sang ber

Sorkar laipui hnuaia thingtlang mirethei in sak ṭanpuina, Pradhan Mantri Awaas Yojana - Gramin (PMAY-G) hnuaiah Mizorama ṭanpuina dawngtu chhungkaw 29,966 zinga 23,619 (78.82%)-in in an sa zo tawh a; Lunglei district-a ṭanpuina dawng 96.10%-in sa zo tawhin, in sa zo tawh tamna ber a ni.

Rural Development (RD) department hotute hnen aṭanga Vanglaini thu dawn danin, PMAY-G hnuaiah hian Mizorama chhungkaw 29,966 hnenah ṭanpuina pek a ni a, chu'ng zinga 25,773 chuan ṭanpuina first instalment an dawng tawh. Second instalment dawng tawh mi 23,705 awmin, third instalment dawng tawh mi 18,200 leh fourth instalment dawng mi 7,639 an awm. In sak ṭanpuina dawngtu chhungkaw 29,966 zinga 23,619 (78.82%) chuan an sa zo tawh a ni.

Mizorama district 11 zingah in sa zo tawh tam berna Lunglei district-ah ṭanpuina dawngtu chhungkaw 4,236 zinga 4,071-in an sa zo tawh a, in sa zo tawhte hi 96.10% an tling. Khawzawl district-a ṭanpuina dawngtu chhungkaw 808 zinga 391 (48.39%) chiahin an la sa zo a, in sa zo tawh tlemna ber district a ni.

RD department hotute sawi danin, PMAY-G hi sorkar kum 2016-17 aṭanga kalpui a ni a; kum 2019 thleng khan instalment pali kaltlangin ṭanpuina pek ṭhin a ni. Kum 2020 hnu lamah instalment hi pathumah tihtlem a ni a, chhungkaw pakhatin ṭanpuina first instalment-ah Rs 78,000, second instalment-ah Rs 45,500 leh third instalment-ah Rs 6,500 an dawng a, a vaiin Rs 1,30,000 an dawng a ni.