Ei tur himna atan nasa zawka hmalak tum

Health & Family Welfare (HFW) minister Lalrinpuii chuan nimin khan a pisaah HFW department hnuaia Food Safety hotute kâwmin, mipui tana ei tur hrisel leh thianghlim a awm theihna tura hmalak dan tur a sawipui a; ei tur himna (food safety) lamah nasa zawka hmalak a tum thu a sawi.

Health Minister chuan, Mizoram mipui tlemte zingah natna hrang hrang, nerve ṭha lo aṭanga cancer thlenga vei an tam thu sawiin, "Natna thlentu zingah ei leh in hrisel lo leh thianghlim lo hi a chhan bulpui pakhat a ni tel. Mizoramin Food Testing Laboratory changtlung kan neih theih nan a hmun tur GAD-ah dilna ka thlen tawh a, a sakna tur sum pawh sorkar laipui lamah ngaihtuah a, theihtawp chhuah tlan a ṭul," a ti.

Thawktu indaih lohna chungchang chu sorkar hotute sawipui thuai a tum thu sawiin Lalrinpuii chuan, mobile food testing van neih mek leh testing laboratory-a khawl neih ang angte pawh mipuite'n ṭangkai leh ṭha zawka hman a nih theih nan hma la turin thawktute a chah.

Food Safety hotute chuan Minister hnenah hian thawktu indaih lohna vang leh testing laboratory changtlung neih loh vangin nasa zawka hmalak a harsat thu an thlen a; tun hnaia FSSAI ranking-a Mizoram dinhmun hniam lutuk chhan chu thawktu tlem vang leh chhan dang dang vangte a nih thu an sawi.

Inkawmnaah hian HFW principal director Dr Vanlalsawma, joint secretary Lalnunmawii Ralte, deputy secretary Vanlalchhuanawma Chawngthu, Food Safety designated officer F Lalliantluanga leh officer dangte an tel a ni.