Magistrate-in sava veh a khap

Aizawl district magistrate Lalhriatpuia chuan thupek chhuahin, October-November, 2024 chhungin Aizawl district-ah sairawkherh, silai/air rifle leh hmanraw dang hmanga sava leh nungcha veh leh pêl khap a nih thu a puang.

Aizawl Bawrhsap chuan, favâng leh thlasik lai chu ramvah, sapêl leh sava veh huna neih a nih ṭhin thu tarlangin, "He'ng hunah hian kan rama sava, ramsa leh sava pêm chíte nasa taka suat a ni ṭhin a, heng zingah hian khawchhak ram thlasik tlansana South Africa ram an pan hmaa Mizorama lo châwl lailâwk ṭhin Sialsir (Amur Falcon Falco Amurensis)-te pawh an tel fo. October-November 2024 thla chhung hian mi tu mahin sairawkherh, silai/air gun leh hmanraw dang hmangin sava leh nungcha dangte an vehin an pêl tur a ni lo," a ti. Thupek zâwm lote chu dan hmanga hrem theih an nih thu a tarlang.