Sorkar hnathawk hâlpuah phur/hâl an awm chuan action lâk a ni ang - HM

Home minister K Sapdanga chuan, Krismas leh kumthar lo thleng turah hâlpuah leh hâlmawi hâl a nih loh nan theihtawp an chhuah dawn thu a sawi a, "Sorkar hnathawk zingah hâlpuah hâl leh phur an awm chuan na takin action lak a ni ang," a ti.

Nimina ZPM chhung inkhawmah thu sawiin Home Minister chuan, "Kristmas hunpui kan hnaih ta a, ZPM sorkar hnuaiah chuan he hunpui hi mipuite'n thlamuang taka an hman theih nan zan vâk police kan nei dawn a, kawngpui dungah chauh ni loin, hmun hrang hrangah mipui thlamuan turin an awm dawn," a ti a, YMA-te nen ṭanghoin ṭhahnemngai takin mipui tan an thawh dawn thu a sawi.

K Sapdanga chuan, kum 2013-a sorkarna changtute'n hâlpuah leh hâlmawi hâl hun an siam thu sawiin, "Khata ṭang khan hâlpuah hâl tumna rilru hi mipuiah an tuh leh a, a pawi hle. Hâlpuah leh hâlmawi vang hian lung lam ṭha lote'n harsatna an tawh phah a, hriselna a tichhia a, damlo tan phurrit a tling. Hâlpuah leh hâlmawi lei nan Mizoram sum tam tak a luang ral ṭhin a, hei hi ṭha kan ti lo. Diwali hmangtute pawh hâlpuah leh hâlmawi hmang tawh lo turin kan ngen mek," a ti.

Home Minister chuan, Aizawl khawpuia YMA hruaitute inhmukhawm pawhin hâlpuah leh hâlmawi hâl lo turin resolution an siam tih sawiin, "YMA-te nen ṭang rualin theihtawp kan chhuah dawn," a ti a; sorkar hnathawk zingah hâlpuah leh hâlmawi phur leh hâl an awm chuan sorkarin na takin hremna a lek dawn thu a sawi a ni.