Assam aṭangin lirthei rawn lut

Mizoram leh Assam ramri buai leh inbeihna thleng vanga Mizoram luhka kawng pui ber October 16, 2020 aṭanga Lailapur-a dan chu nimin zing khan tihtàwp a ni a, nimin khan Assam aṭangin lirtheite Mizoramah an lut ṭan nghal.

Ramri hnaiha lirthei tangkhang a tam tawh avang leh Vairengte-ah Covid-19 vangin swab sample endik hmasak ṭhin a nih avangin lirtheite chu thui tak an intlar tawh a; nimin tlai dar 4:30 thleng khan Vairengte police checkgate chu bung­raw phur lirthei lian 200 chuangin paltlangin Mizo­ram chhung an lut tawh.

Hetih lai hian, nimina Vairengte khawtlang hruaitute ṭhukhawm chuan, Mizo IR police duty-te'n ramria an duty-naah ruahsûra tawm hulna ṭha an neih loh avangin, an tawm hulna tur saksak nimin khan an rél a ni.