Children’s Day hman dan tur rel

Saitual district bawrhsap Dr Lalngura Tlau kaihhruaiin nimin khan November 29, 2024-a Children’s Day hman dan tur sawiho a ni a; Children’s Day pual hian World Day for the Prevention of Child Abuse hman nghal an rel.

Dr Lalngura Tlau chuan, naupangte'n intihhlimna hun an mamawh thu a sawi a, "Children’s Day hi 'naupangte ni' a nih angin naupangte'n hlim taka infiamna hun an hman theih ka beisei," a ti a, district hmasawn zel nan thawhhona ṭha nei zel turin kalkhawmte a fuih.

Ṭhukhawm chuan, Children’s Day chu Keifang Centenary Sports Complex-ah hman a rel a; he niah hian World Day for the Prevention of Child Abuse hman nghal ni se, tlangau intihsiakna lawmman pawh sem nghal ni se, an ti. Children's Day lawmnaah hian naupangte tan intihhlimna leh infiamna chi hrang hrang buatsaih an tum bawk.