Hnungtawlh lo turin sorkar an chah
BJP, Mizoram Pradesh leh Peoples' Conference (PC) party-te chuan, Vairengte thlanga ramri vengtu police-te chu hnûk kîr lo turin Mizoram sorkar an chah.
BJP, Mizoram chuan thuchhuah siamin, tun hnaia Mizoram ramri hrúla Bangladesh Muslim infiltrator-te'n harsatna an rawn siam chungchangah MNF kaihhruai Mizoram sorkar chu engti kawng pawha hnung tawlh lo turin an chah tih an tarlang.
Mizoram BJP chuan, Mizoram china police dahte chu hnûkdawk rih lo tur leh Mizo mipui leh tlawmngai pawlte'n sorkar an thlàwpna chu dawngsawng thiam turin Mizoram sorkar an chah a, "Ramri hrúla Bangladeshi infiltrator-te'n kan police force-te bûk ṭhiat a, lunga an vawm mai mai tawh lohna tur leh, Vairengte mipuiin an chhan ngai khawpa an awm tawh lohna turin Pu Zoramthanga sorkar hian huai takin hma la rawh se," an ti.
Mizoram BJP chuan, "Kan state sorkar leh kan CM chêt dan azirin Mizo mipuite hi kan inthurualin kan inthurual lo mai ṭhin a, mipuite hi ram leh hnam tan kan inpeih. State sorkar leh CM Pu Zoramthanga kaihhruai hi a inpeih em tih chu kan thlir mek a ni," an ti.
BJP hian Mizoram sorkar chu 'Lungrualna hi ram leh hnam tan himna kulhpui ber a lo ni e,' tih chu sa ringawt lo a, a taka hmang turin an chah a ni.
PC party pawhin, Mizoram leh Assam ramri buai vanga inbiakna kal mekah eng anga boruak muanawm pawh inmun chhuak se, ramria Mizoram police awmte hnûk kîr zawnga hma la lo turin Mizoram sorkar an phût.
PC thuchhuah chuan, Assam lamin tuna Mizoram police-te awmhmun khuarna an ngaihmawh thu leh hnûkkîr tura Mizoram an karna chu pawm chia an ngaih loh thu tarlangin, "Tuna Mizo IR-te duty-na hmun hi tichangtlung zawk tur leh police-te mamawhte thuam ṭha zawk turin Mizoram sorkar kan phût a ni," a ti a; ram leh hnam humhim nan leh Mizoram dikna leh chanvo tundin nan tun aia chak leh huaisen zawka kal ngei turin Mizoram sorkar an phût tih an sawi.