Hripui vei hmuh thar mi 31 zinga Mi 22-in Covid-19 symptom an nei

October 21, Nilainia Mizorama Covid-19 vei hmuh chhuah mi 31-te chu Mizoram chhunga kái chhâwng vek an ni a, state páwn aṭanga rawn lut an tel lo. An zinga mi 22 chuan taksaah harsatna an nei (Covid-19 symptom a lang)-a hriat a ni.

Covid-19 positive Nilainia hmuh chhuah zingah Covid-19 symptom nei mi 22 an awm laiin, symptom lang lo chu mi pakua chiah an awm a; mi 31 zinga mi 12 chu an kàina hriata ngaih niin, a tam zawk, mi 19 erawh chu an kài chhan leh kài ṭanna hriat theih rih loh an ni thung.

Zemabawka Ebenezer School Hostel-a awm zirlai zingah Covid-19 vei mi pakua hmuh chhuah a ni a, hostel warden pakhat leh zirlai pariat an ni. School Principal chuan Vanglaini palai zawhna chhángin, an zirlaite chuan hripui an kài ṭanna àwm an hriat theih loh thu a sawi a, "Pawl 10 zirlai vek an ni a, an zinga pakhat hi SRH-ZMC-ah lak a ni a, a dang zawng chu Bawngkawn Brigade-a CCC-ah an awm ang," a ti.

Aizawl mai bakah, district khawpui dangah pawh vantlangah a darh ṭana ngaih a ni a; Serchhip khawpuiah Mizoram chhunga kái leh kàina hriat chian loh an awm nual hnuah, Lunglei khawpuiah pawh Venglai mi pahnih, Mizoram chhunga kái chhawng nia hriat hmuh chhuah a ni.