Ministry of Home Affairs joint secretary-in Governor leh Chief Minister a kâwm

Ministry of Home Affairs (MHA) joint secretary (North East) Satyendra Garg chuan nimin khan Governor PS Sreedharan Pillai leh chief minister Zoramthanga te an chenna in ve veah a kâwm a, Mizoram ramri chungchang a sawipui.

Raj Bhavan-a Larsap a kawmnaah Satyendra Garg chuan, tun hnaia Mizoram leh Assam ramria innghirnghona tudai tura Silchar-a Mizoram leh Assam sorkara home secretary-te inbiakna a kaihhruai chungchang leh Mizorama a kal chhante a hrilh.

MHA-in state ramri chinfel thuai a duh thu sawiin MHA Joint Secretary chuan, "Mizorama rawn lut tur lirthei dan tihtawp chu ngaih pawimawh hmasak ber a nih angin tihhlawhtlin a ni," a ti.

Governor chuan, ramri chungchanga Mizoram sorkar leh Mizoram mipuite dinna a sawifiah a; ramri buaina chu sorkar laipui kaihhruaina hnuaiah a rang lama chinfel thuai a ṭul thu a sawi.

MHA Joint Secretary hian Chief Minister chu a chenna banglaah a kâwm a; Mizoram leh Assam ramria innghirnghona awm chinfel chungchanga hmalakna a sawipui.

Satyendra Garg chuan, sorkar laipuiin state pahnih inkar boruak muanawm tak awm a duh thu sawiin, "Ramri chungchanga inhmuh thiam lohna awm pawh state pahnihte tana pawmawm tur inremna siam a nih thuai ka beisei," a ti.

CM Zoramthanga chuan, Assam leh Mizoram inkar ramri buai avanga innghirnghona chu a reh thuai a duh thu sawiin, "Boruak ṭha zawk a awm theih nan theihtawp Mizoramin a chhuah a ni," a ti a; Tripura leh Mizoram inrinaah chuan harsatna a awm loh thu Satyendra Garg a hrilh a ni.