MZP-in Home Minister an dem

MZP chuan nimin khan thuthar thehdarhtute an kâwm a; Mizoram leh Assam ramria buaina awm mekah, Mizoram IR police duty-te chu an awmna aṭangin nimin khan Vairengte lamah an insawn chho niin an tarlang a; ramri chungchangah Home Minister an dem thu an sawi bawk.

Nimina thuthar thehdarhtute an kawmnaah MZP president B Vanlaltána chuan, Home minister Lalchamliana chu ramri buaina hmun hrang hrangte a la tlawh lo chu hriatthiam har an tih thu a sawi a, "Ramri avanga harsatna hrang hrang thlen mek laia IR-te an duty-na aṭanga hnuh kîr an ni leh Assam police-te an rawn chhoh avang hian a rang thei ang bera an awmna ngaia awm leh nghal turin sorkarin hma la nghal se kan duh," a ti.

Mizoram IR police-te insawntir an ni chu dik lo an tih thu sawiin Vanlaltana chuan, "Ramri humhalhna kal lai meka sorkar chêt dan hi mak kan ti a, hriatthiam har kan ti tak zet. Vawiin (Ningani)-ah Assam police-te chu auto stand-ah an rawn thleng tawh a ni," a ti a; Assam police-te chu chhuktir leh nghal turin Mizoram sorkar an phût tih a sawi.

MZP President chuan, October 21-ah Home secretary Lalbiaksangi'n 'Assam ramah IR-te kan dah lo, Mizoramah kan dah' a tih hnu lawkah, nimin khan Mizoram sorkarin IR sipaite a hnûk kîr leh si niin a sawi a, "A hmaa Home Secretary-in IR-te awmna a sawi hi Assam ramah Mizoram sorkarin a ngai leh si em ni?" a ti.

Ramria police duty leh hnuhkir chungchangah hian nimin khan chief minister Zoramthanga an bia tih sawiin B Vanlaltana chuan, "Heng thil thlengte hi CM-in a lo hriat loh avangin Home Minister, Chief Secretary leh Home department official-te hnenah kan position ngaia awm leh tur leh Assam police-te pawh chhuktir leh vek turin Home Minister leh official-te a hrilh nghal hi lawmawm kan ti hle a ni," a ti a; Chief Minister hriatpui loha official-te'n thil an ti chu an dem thu a sawi.

MZP President chuan, Vairengte thlanga Mizo IR sipaite an duty-na hmun aṭanga sawn an nih avang leh Ningani zan aṭanga kawngpui dangtu MZP hruaitute leh Vairengte Ṭhalai  Pawl hruaitute chu police-in an man tih a sawi a, "A rang thei ang berin Vairengteah kawng dang chhunzawm turin kal ni se kan ti a, mi eng emaw zat chuan Vairengte kan pan nghal a ni," a ti.