RBI-a Mizoram sum vbc 520 a ni tawh; K Deposit-a pawisa dah kan khawn mek - CM

Finance enkawltu chief minister Lalduhoma chuan, Reserved Bank of India (RBI)-a Mizoram sum awm (balance) chu minus (-) vbc. 389 aṭangin plus (+) 520 a nih tawh thu a sawi a, "Tunah hian kum thum chin chung lam K Deposit-a pawisa dah kan khawn mek a, cheng vbc 425 zet kan la chhuak tawh," a ti.

Lalduhoma hian nimin khan Aijal Club-ah Mizoram Economic Association buatsaih Mizoram Economic Summit 2024 hmanpuiin, thu a sawi a, "Nikum 2023 financial year inṭan ní April 1, 2023 khan RBI-a kan sum balance chu minus vbc. 389 a ni a, kumin April 1 khan cheng vbc. 520 kan nei hman. Minus ni tawh loin plus kan nei tawh a, kan lawm hle. Miin tih tak zeta ṭan a lak chuan hun rei lo te chhung pawhin thui tak a kal theih a ni tih hi a chiang," a ti a; ram tan tih tak zeta hna thawk turin sorkar hnathawkte an phûr thu a sawi.

Kum thum leh a aia rei K Deposit-a pawisa dah tawh an khawn mek thu sawiin Lalduhoma chuan, "K Deposit hi a lo zalên viau a, tunah hian kum thum chin chung lam kan khawn mek. Zuk khawn tâkah chuan department khan an han ngaihtuah chawp a, min rawn pe ve a, khatia tih loh chuan zawt thut ila, K Deposit-a an dah zat sawi ngaihna an hre lo," a ti.

CM Lalduhoma chuan, Mizoram sorkar chu sum enkawl danah a lo muthlu viau nia sawiin, "Tunah hian K Deposit aṭanga kan lak chhuah hi cheng vbc 425 zet a tling tawh," a ti a; K Deposit awm miah lo chuan thil tih theih loh mah se, a tlem thei ang ber ni turin an infuih thu a sawi.

Department-in anmahni thua project an lo thehlut ve mai ṭhin chu an remti tawh lo tih sawiin Lalduhoma chuan, "Planning department kaltlang chauhin thehluh tawh ni se kan ti," a ti a; service review committee din turin department tin an tih thu sawiin, "Sorkar hnathawk tlak lote dap chhuah a, a ṭul anga bàntir thlenga hmalakna tur a ni," a ti.

Chief Minister chuan, sorkarna an chan tirhah leiba tam tham tak an chhawm thu sawiin, "Kan kawng a chho nghal hle a, theihtawp chhuahin renchem takin sum kan enkawl. Healthcare sum bâ te, power bill bâte kan pe thei ta a, power bill-ah phei chuan rebate hmu hialin kan ti ṭha. GP Fund tam tham tak pek chhuah a ni a, pension sum rei tak tak lo táng tawhte pawh chinfel a ni," a ti a; election duty bill táng tam tak pek a nih thu te, hun rei tak sorkar hnathawkte hlawh leh hamṭhatna batsak tawhte pawh eng emaw zat chinfel a nih thu a sawi.

CM Lalduhoma chuan, corporate social responsibility (CSR) chu Chief Minister's Office aṭangin an vil tawh dawn tih a sawi a, "CM office hian CSR hna thawh kan tum a ni lo a, mumal leh fel fai zawka CSR kalpui kan tum zawk a ni," a ti.

Inkhawm hi Mizoram Economic Association executive member Samuel J Laltlanzaua'n a kaihruai a, president Dr James LT Thanga'n intawhkhawm buatsaih chhan a sawifiah a ni.