Mizoramah voter 8,58,534 an awm

Mizoram electoral roll ennawn turah nimin khan district election officer-te'n an district ṭheuhah Draft Electoral Roll an tlangzarh. Draft roll-ah hian voter 8,58,534 an awm.

Sorkar thuchhuah tarlan danin, Election Commission of India ruahman angin India khua leh tui dik tak, October 1, 2024-a kum 18 tling (pumhlûm) hman turte chu electoral roll ennawnnaah hian thun theih an ni a; October 29 nimin aṭanga November 28, 2024 chhungin mahni bialtu ERO/AERO/BLO hnenah electoral roll-a inthun luh dilna thehluh theih a ni. Dilna chu https://voters.eci.gov.in leh Voter Helpline application aṭangin thehluh theih a ni bawk.

Nimina tlangzarh tak draft electoral roll-ah hian voter 8,58,534 an awm a, mipa 4,15,867 leh hmeichhia 4,42,667 an ni. Mizoram pumah service voter 4,350 awmin, mipa 4,259 leh hmeichhia 91 an ni a; voter pangngai leh service voter zawng zawng chu mi 8,62,793 an ni.

Mizoram draft electoral roll-a voter 8,62,793 zingah hian mipa aiin hmeichhia 26,800-in an tam zawk a, Mamit district tih loh district dang zawngah mipa aiin hmeichhia an tam; Mamit district-ah chuan hmeichhia aiin mipa 579-in an tam zawk thung.

Aizawl district-ah voter 2,88,962 awmin an tam ber a, Mizoram puma vote nei mi 8,58,534 aṭangin 33.66% an tling. Voter tlem berna Hnahthial district-ah 16,276 an awm a, Mizorama voter zawng zawng aṭangin 1.90% a ni. Mizoram pumah vote thlakna hmun, polling station 1,301 a awm mek.