9th National Ayurveda Day hman a ni
Health & Family Welfare department hnuaia Directorate of AYUSH chuan nimin khan Assembly Annexe conference hall-ah National Ayurveda Day vawi 9-na an hmang a, Governor Dr Hari Babu Kambhampati leh HFW minister Lalrinpuii ten an hmanpui.
Governor Dr Hari Babu Kambhampati chuan, ayurveda chu hriselna tana inenkawlna mai ni loin, nunphunga bet tel a nih thu a sawi a, "Mizoram leh hmarchhak state hi nungcha hrang hrang tamna, hausa leh theihna nasa tak nei a nih avangin hengte leh ayurveda kan thlun zawm chuan kan healthcare system kan tichangtlun thei ang," a ti.
Ayurveda chawi lârna tura Ministry of AYUSH hmalaknate sawiin Larsap chuan, "Ayurveda aṭanga thil siamte ram 100 chuangah thawn chhuah tawh a ni," a ti a; ayurveda tihhmasawn kawngah thawkhoa theihtawp chhuah turin sorkar, research institution leh mahnia eizawnna buaipuitute a chah.
Khualzahawm HFW minister Lalrinpuii chuan, ayurveda-in natna hrang hrangte enkawlnaah pawimawhna a neih thu a sawi a, "Mizorama ramhmul damdawi tam tak kan neih leh hemi lama tualṭo thiamna kan neihte hi ayurveda chawi lârna atan a ṭangkai thei a, healthcare system pangngai nena kalkawptir thiam a ṭul," a ti.
State Medicinal Plants Board chairman ni bawk Lalrinpuii chuan, "Ramhmul damdawi chìn leh sâwngbàwlna atan cheng vbc 1.2 project 'Forward and backward linkage in supply chain of medicinal plants - Integrated Component' kalpui mek a ni," a ti a; Handholding Policy-ah medicinal plant telh tuma hmalak mek a nih thu a sawi.
Health Minister chuan, AYUSH hmalaknate chu healthcare system nena kal kawp turin PHC, CHC, District Hospital, AYUSH Health & Wellness Centre 41 leh Integrated AYUSH Hospital, Thenzawlahte hmalak tum a nih thu te, zirna-in changtlung zawkte nen zirbingna neih tuma ṭan lak a nih thu leh, Traditional Medicine Preservation and Promotion Centre leh Herbal Garden-te Mizoramah din tuma hmalak a nih thute a sawi bawk.
Kumina National Ayurveda Day thupui chu 'Ayurveda Innovations for global health' tih a ni a, a hmanna inkhawm hi AYUSH director Dr Vanlal-sawma'n a kaihruai. National Ayurveda Day puala article inziahsiak lawmman sem a ni a; pakhatna Lalsangzeli, Khawlailung, pahnihna Dr Jonathan Lalrinmawia, ITI Veng leh pathumna Lalnuntluanga, College Veng, Aizawl-te an ni.