History dik nei turin ṭan lâk a ngai - Art & Culture Minister

Art & Culture department leh Mizo Academy of Letters (MAL) chuan nimin khan Champhai College multipurpose hall-ah ‘Thu leh hla kûtpui’ (literary festival) an huaihawt a, Art & Culture minister C Lalsawivunga'n hmanpuiin, Mizo zawng zawng pawm theih tur history dik nei turin ṭan lâk a ngaih thu a sawi. Zirhonaah hian mi 275 an tel.

Art & Culture Minister chuan, Mizote'n an history an ngai pawimawh thar nia sawiin, "History dik nei tura ṭan kan lak a ṭul a, tuna ke kan pên loh chuan ṭhang lo thar zela kan thlahte chu kan history hriatnaah an dal ang a, hawi lam tur bik hre loin an darh nuai mai ang tih a hlauhawm. Tun hi ṭan kan lak hun a ni a, Art & Culture department chuan theihtawpin hma kan la a ni,” a ti.

Mizo historian-te'n ṭha­hnem­ngai takin bul lo ṭan tawh mah se, sorkar angin ‘Hei hi a dik chu a ni e,’ tia pawm a la awm loh thu sawiin, "Kan zavaia kan pawm tlan theih tur history kan neih theih nan hma kan la a ni. Kan hnam zia tihhmasawn a, vawn nun zel hi Mizo ṭhalaite mawh­phurhna leh tih tur a ni a, kan culture-in hma a sawn theih nan ngaihtuahna kan sêng ang a, kan zir chiang ang a, khawvela pho­lang ve turin hma kan sawn ve tur a ni," a ti a; history dik leh ṭha, Mizo zawng zawng huapzo nei tura ṭan lak a ṭul thu a sawi.

‘Thu leh hla kûtpui’ hawnna hi Champhai DC VL Remliana'n a kaihruai a, zirhona thupui chu 'Zo fate thlang tlak dan zir chianna’ tih a ni. Chawhmaa zirhona MAL general secretary Dr Zoramdinthara kaihhruaiah T Romana College-a Prof. Malsawmliana buatsaih 'Zo fate thlang tlak dan – Lungphun hmanga zirchianna’ tih zirho a ni a; chawhnuah MAL assistant secretary Dr H Laldinmawia kaihhruaiin Aizawl West College assistant professor Dr Malsawmdawngliana paper ‘Zo fate thlang tlak chhan leh an thlang tlakna kawng’ tih zirho a ni.