Mizoram hi Congress-in a enkawl loh chuan a tluchhe ṭhin - MPCC Treasurer

Mizoram Pradesh Congress Committee (MPCC) treasurer Dr Lalmalsawma Nghaka chuan, Congress party kaihhruai sorkar chu party dangte sorkarin a tluk lo nia sawiin, Mizoram chu Congress party-in a enkawl loh chuan a tluchhe ṭhin niin a sawi.

Dr Lalmalsawma Nghaka hian October 28-29, 2024 chhung khan Sinlung Hills Council inthlan atan Phainuam-Saipum tlangdunga vantlang inkhawmah thu a sawi a, "Kan ram hi Congress party-in a enkawl loh chuan a tluchhe ṭhin. Congress hun lai kha thlir lêt ang u, party dangin min sawisel viau ṭhin mah se, min tluk lo a ni," a ti.

Sum renchem chungchangah party dangin Congress sorkar entawn se a duh thu sawiin, "Congress party chuan vawiina board awm leh thluah tawhte hi mipui sum tihektu a ni tih hriain huaisen takin kan ṭhiat ngam, MNF sorkarin khang board-te kha an tharthawh leh a, party hotute leh candidate chang lote tihlawm nan an hmang," a ti a; ZPM sorkarah an party hotute board chairman leh member-ah an indah nasat bakah, an hlawh a lêt tam taka an tipun thu a sawi.

MPCC Treasurer chuan, SHC inthlan turah bial hrang hrangah party dangin therhlo leh sum chakna hmanga mipui bum tumin an thlêm mek nia sawiin, "CM Special Package rulh ngai lo loan-te an rawn zuar thar mek a, rulh ngai lo tak tak tur a nih chuan loan ti loin hming dang phuah mai se la, rulh ngai lo hi loan a nih theih a rinawm lo," a ti.

Dr Lalmalsawma chuan, "SHC inthlan turah hian kan auhla ber chu SHC Development Fund-te mipui tan a hmanna tur dik takah hman a ni ang. Congress candidate-te thlan tlin an nih chuan bial mipuite tih tak zeta rawngbawlsak tur leh an tan inpumpek tura intiamte an ni," tiin, Congress candidate-te vote turin mipui a sáwm a ni.