Scho' sem thuai turin sorkar phût

MNF party chuan thuchhuah siamin, zirlaite scholarship chungchangah Mizoram sorkar a inthlah­dah niin an tarlang a; zirlaite hnenah scholarship sem chhunzawm thuai turin sorkar an phût.

MNF chuan, zirlaite hnena scholarship sem a khaihlak nia sawiin, pawi an tih thu an tarlang a, "A changtu Minister ber che chhuak loa zirlai pawl chêt chhuah ngaia a awm hi thil zahthlak a ni. Central aṭanga sum release a nih tawh laia a dawngtu tur zirlai, mamawh ngawih ngawihtute hnena sem chhunzawm a la ni lo cheu hi sorkar inthlahdah vang liau liau a ni. Central aṭanga an sum dawn tawh hi a rang thei ang bera pe chhuak thuai turin Mizoram sorkar kan phût," an ti.

State sorkarin a tum ve tur a tihfel har vanga zirlaite tawrhna chinfel thuai an phût thu sawiin MNF chuan, "Mipui hnena inthlahrung hauh loa chhiah sang tak tak an lak belh laia mamawhte hnena pek chhuah tur an pe chhuak hreh tlat hi Mizoram sorkarin mipui leh zirlaite a ngaihthahzia tichiangtuah kan ngai," an ti a; Mizoram sorkar chu zirlaite zirna kawng tibahlahah puhin, an dem thu an tarlang.