Ramri buainaa hlawhchhamah ZPM Ṭhalaiin sorkar an puh
ZPM party ṭhalaite chuan thuchhuah siamin, ramria buaina chungchangah chief minister Zoramthanga kaihhruai sorkar chu a hlawhchhama an ngaih thu an tarlang.
ZPM Ṭhalai chuan, Mizo IR police-te chu an awm mekna aṭangin Vairengte lamah sawn chhoh an ni tih sawiin, "An awmna aṭanga Vairengte lama an sawn chho mai hi àwm ang lo kan ti a, Assam police-te'n auto stand-a rawn insawn chhoh phah nana an hmang leh zel phei hi chu tlàwm thlak kan ti hle a ni," an ti. "Heng thilte hi Chief Minister-in a hre lo leh zel phei hi chu, sorkarna chelh mektu, Pu Zoramthanga kaihhruai administration-ah a hlawhchhamzia a pho lang chiang hle," an ti bawk.
ZPM ṭhalaite chuan, "Zoramin harsatna a tawh mek laia Chief Minister a lo muthlu leh NGO-te'n thil awm dan an hrilhfiah zawk ngai khawpa CM ber bangbo taka a awm hi, ram tana a rawngbawlna hna a tui tawh ngang lo em ni?" an ti a; insawi pawrha duh tâwk mai lo a, a taka che chhuak tur leh official-te'n an biakràwn tlâka awm turin CM Zoramthanga an chah a ni.
Citizenship Amendment Act (CAA) chungchangah ZPM Ṭhalai chuan, "CAA hnuaia provision-te hi tawktarh atana hmana barh luih chi kan ni lo a, engti kawng maha pawm theih chi pawh a ni lo," an ti a; CAA chu Supreme Court-in paih ngei se an duh thu an tarlang.
ZPM Ṭhalai chuan December 27, 2019 khan Governor's Secretariat kaltlangin MHA-ah CAA an duh loh thu an thlen a, October 21, 2020 khan MHA aṭangin chhànna an dawng. MHA chhànnaah chuan, CAA chu hman a nih lohna turin Supreme Court-ah khin mek a ni.