Mizoramah UNICEF office din turin ngen

Rajya Sabha MP K Vanlalvena chuan October 28, Thawhṭanni khan USA khawpui Washington-ah USA Department of State officer (East Asia, South East Asia and Pacific region changtu) Erin Kimsey chu a pisaah a kâwm a; Mizoramah United Nations International Children's Emergency Fund (UNICEF) office din a nih theih nan hma la turin a ngen.

K Vanlalvena chuan, Erin Kimsey hnenah hian Mizoram chu Myanmar, Bangladesh leh Manipur aṭangtea politics kal fuh lo vanga raltlante fuan khawm mekna a nih thu a sawi a, "Raltlante zingah hian naupang kum tling lo tam tak an awm a, zirna ṭha, chaw ṭha, damdawi ṭha leh silhfen thianghlim bakah, chenna hmun ṭha leh thianghlim an mamawh. An mamawhte pe vek turin Mizoram chu India rama state intodelh lo berte zinga mi a nih avangin kan tan thil harsa tak a ni," a ti.

Rajya Sabha MP hian a rang thei ang bera Mizorama UNICEF office hawn a nih theihna tura hma la turin Erin Kimsey a ngen a; Erin Kimsey chuan pawimawh a tih thu a lo hrilh.

K Vanlalvena hi USA-a awm mek Chin Association of Maryland executive director Zo Tum Hmung leh board chairman Rev. Tim Sienna-te'n an ṭawiawm a; Erin Kimsey hi India desk officer leh USAID officer-te'n an ṭawiawm bawk.