MRB, Siaha Branch hmun thar hawng

Mizoram Rural Bank (MRB), Siaha Branch hmun thar chu nimin khan Mara Autonomous District Council chief executive member M Laikaw-a'n a hawng. Hawnna inkhawmah hian MRB general manager Lallawmzuala Colney pawh a tel.

MRB hi September 27, 1983 khan Regional Rural Bank Act, 1976 hnuaiah din a ni a, branch 105 nei mekin, Mizorama RD block tinah branch an nei tawh a, kum 2011 aṭang khan CBS hmangin branch zawng zawng thlun zawm vek a ni.

MRB hian April-September, 2024 chhung khan deposit cheng vbc. 5,286.22 an hmu a, cheng vbc. 3,470.46 an pe chhuak thung. Mizorama bank awm 25-a deposit zawng zawng aṭangin MRB-a deposit hi 29.94% a tling a, loan an pek chhuah tawh Mizorama bank-te loan pek chhuah zawng zawng aṭangin 35.29% a tling.

MRB-in September 30, 2024-a dinhmun an tarlan danin, Mizorama PMJDY account 3,80,856 zinga 2,96,238 (77.78%) chu MRB-a account nei an ni a; Mizorama PMJJBY account 2,98,374 zinga 1,62,053 (54.31%) chu MRB-a mi a ni. Mizorama PMSBY account 5,50,622 zinga 2,87,360 (52.18%) chu MRB-a mi a ni bawk.