Legal Aid ukilte'n thubuai 2,503 khawih Covid-19 vangin ukilte lawmman ba rih

Court-a thubuai nei, ukil rawihna nei lote sorkarin ukil a rawihsakna, Free Legal Aid-a awm legal aid counsel-te'n kum 2019 chhung khan thubuai 2,503 an khawih. Hetih lai hian, ukil ruai thei lote sorkarin a rawihsaknaa ukilte lawmman tur chu bat rih a ni thung.

Vanglaini palaiin a kawmnaah MSLSA hotute chuan, Free Legal Aid-ah hian ukil-te chu panel lawyer/Legal aid counsel-ah te, retainer lawyer leh remand lawyer/advocate-ahte ṭhen an nih thu an sawi. Ukil-te chuan ro inchuh thubuai, zu chungchang thubuai leh chhungkaw buaina an khawih tam ber a, thubuai dangte pawh an khawih tel tho tih an sawi a ni.

Free Legal Aid hi Mizoram State Legal Services Authority (MSLSA) buaipui a ni a; tun dinhmunah district hrang hrangah Free Legal Aid atan ukil rawih lai (legal aid counsel) mi 123 an awm mek. Legal aid counsel hi Aizawl district-ah 70, Lunglei district-ah 26, Siaha district-ah pahnih, Champhai district-ah pakua, Kolasib district-ah panga, Serchhip district-ah pathum, Lawngtlai district-ah paruk leh Mamit district pahnih an awm.

MSLSA member secretary R Vanlalena sawi danin, National Legal Services Authority (NLSA) chuan kum dangah chuan MSLSA hnenah hna an thawh nan cheng nuai 300 vel an pe ṭhin a; kuminah erawh chuan Covid 19 léng vangin sorkar laipuiin pawisa a pek theih loh avangin ukilte lawmman an pe thei rih lo.

Legal aid counsel atana rawih ukilte chuan an lawmman tur a hlawmin MSLSA-ah an thehlut ṭhin a, tunah erawh Covid-19 avanga sum an dawn loh avangin ukilte chu an châwl vek rih a ni.

MSLSA Member Secretary chuan, "Covid-19 vanga central aṭanga sum kan dawn rih loh avangin Mizoram Bar Association hruaitute pawh thil awmzia kan sawipui a, hri léng vanga harsatna awm hi an hrethiam khawp mai," a ti a; sum neih loh vanga an harsatnaah Law & Judicial Minister-in hma a lâkpui tawh thu leh Chief Minister hnenah pawh an thlen tawh thu an sawi.

NLSA aṭanga MSLSA-in sum a dawnte chu dan hriatna lamah mipuiin hma an sawn theihna atan leh hnathawhna hrang hrang atan an hman ṭhin a ni a; seminar, legal awareness campaign-te buatsaihin college leh YMA hall-ahte hun an hmang ṭhin. Sorkar ukilte tan training an buatsaih ṭhin bakah, sorkar hnathawkte chu an department-in khingtu an neih chánga ṭul pawimawh an hriat zung zung theih nan training an pe ṭhin bawk.