KHAWTHLIR
Dawrpui vengah containment area
Dawrpui veng tlak lam (Dawrpui West), Bazar Bungkawn - Vaivakawn kawnga VLT Muana in leh Seikungi in inkar chu Aizawl District Magistrate chuan containment area-ah a puang. Containment area-ah hian phalna nei tan lo chuan luh leh chhuah phal a ni lo.
SRH ICU-ah 3
State Referral Hospital-ah nimin khan Covid-19 vei mi pasarih dah luh belh a ni a, tun dinhmunah hripui vei vanga enkawl mi 48 an awm. SRH-ZMC Bulletin tarlan danin, mi 48 zinga pathum chu ICU-ah enkawl an ni a, pakhatin ventilator a hmang a, mi pahnih chu ngaihtuahawm an ni lo. Isolation ward-a awm mi 45 zingah harsatna lian tham nei an awm lo.
Vairengte lawm
Vairengte Joint Village Council chuan lawmthu sawina tichhuakin, October 17, 2020 (Inrinni) zana tlai dar 6 vel aṭanga Mizoram (Vairengte) ram chhunga Lailapur mi (Bangladeshi illegal migrant)-te'n buaina an siam chungchangah, Mizoram mipui thlàwpna leh puihna avangin an lawm tak zet tih an tarlang.
Lawmman sem
IPR department leh Mizoram Art Development Society ṭangkawpin 'Covid-19 hripuiin nun a nghawng dan’ tih thupui hmanga lem inziahsiak an buatsaiha ti ṭhate hnenah nimin khan Aizawl Art Gallery-ah lawmman sem a ni a, IPR secretary Sangdingliana'n a hmanpui. Intihsiaknaah hian mi 71 an tel a; pakhatna Liansangmuana, Lunglei Electric Veng, pahnihna Lalramchuana Sailo, Zarkawt leh, pathumna Lalhmingmawii, College Veng, Aizawlte an ni.
RAT tih theih
Mizoram sorkar chuan Aizawla private hospital pali-ah Rapid Antigen Test (RAT) hmangin swab sample endik theih a nih thu a puang. Chu'ng damdawi-inte chu - Synod Hospital, Ebenezer Medical Centre, BN Hospital leh Trinity Hospital-te a ni.
Thlai chi sem
Lungleia Horticulture conference hall-ah October 21, Nilaini khan Lunglei HPC bultumin loneitu mi 200 hnenah thlai chi hrang hrang 16 chî sem a ni.