ZMC hi zirna lian zawk a nih thei nan sorkarin hma a la zel ang - Chief Minister

Chief minister Lalduhoma chuan nimin khan Zoram Medical College (ZMC)-a hmeichhe hostel thar leh Post Graduate Degree in Public Health zirna thar a hawng. CM chuan, ZMC chu zirna ṭha zawk leh lian zawk a nih theih nan a theihna apiangah hma a lak zel tur thu a sawi.

CM Lalduhoma chuan, ZMC-in hma lam a pan zel tih a taka hmuh theih a nih thu sawiin, "Sorkarin a ngaihthah ngai dawn lo che u. ZMC-a thawkte hi sorkar leh society angin ṭhuang hnihin in kal tih kan hria a, in zavaia sorkar ta in nih theih dan tur kan ruahman mek a, Council of Ministers ṭhutkhawm leh hunah ngaihtuah kan tum," a ti.

Mizoramin medical college a neih chhun ZMC chu a hlu hle tih sawiin Lalduhoma chuan, "Kan mamawh medical professional ṭha kan chher chhuak ṭan ta. Kum 2018-a zir ṭan MBBS batch hmasa berte kumin kum tirah an graduate a, batch pahnihna zirlai 97-te'n intern an ti leh mek," a ti a, zirlai 480 dangin an zir mek bakah, batch thar admission pawh tih leh mek a nih thu leh, ZMC aṭangin kum tin doctor thar 100 vel an chhuah zel chuan doctor an indaih tial tial dawn thu a sawi.

Chief Minister chuan, ZMC hmunhmate a fan kual thu sawiin, "Mamawh tam tak a la awm tih ka hmu. A bik takin dialysis lama mamawh te, cardialogy lama manpower kan mamawhziate ka hmu. Tunah hian PM-ABHIM scheme aṭangin khum 50 awmna critical care block sak kan tum mek," a ti.

CM-in a hawn tâk hmeichhe hostel - Curie's Ladies Hostel tia a hming vuah hi Ministry of DoNER, NESIDS OTRI sum vbc. 10 hmanga sak a ni a; Mizo chhiar dana chhawng ruk niin, Mizoram PWD-in kum 2 leh thla 9 chhung an sa. A tirah khum 80 awm theihna tura duan ni mah se, khum 84 dah theih tura sak zawh a ni. Hostel thar leh hostel awm tawh sate nen ZMC-a hmeichhe hostel bikah khum 282 a awm tawh dawn a ni.

ZMC-a master degree zirna hmasa ber tur Master of Public Health chu vantlang hriselna lama mithiam bik chher chhuahna tur a ni a; Mizoram University hnuaia kalpui tur niin, kum tin zirlai paruk zel lak tur a ni. Kum hnih chhung zir niin, zir man kum khatah Rs 2,00,000 vel a ni a, batch hmasa ber tur zirlai parukin admission an ti tawh.

Curie's Ladies Hostel leh Post Graduate Degree in Public Health zirna thar hawnnaah hian bialtu MLA Baryl Vanneihsangi leh corporator Dr Malsawm-tluangi te pawh an tel.