Document lem siamtu man a ni - MZP

MZP Gen.Hqrs chuan Mizoramah certificate leh document chi hrang hrang lem siam a tam nia an hriat thu leh, document lem siam ṭhin ni ngeia hriat mi pakhat chu man a nih thu an tarlang.

MZP chuan, tun hnaiah certificate leh document lem siam an awm ngei nia an hriat avangin an chhui zui a, "Document hrang hrang - educational certificate (pawl sarih aṭanga chung lam zawng), birth certificate, driving license leh professional certificate (B.Ed., D.El.Ed., adt)-te hi tîmna nei hauh loa a lem siam chhuak an awm ngeiin kan hria," an ti.

An chhuinaah document lem siamtu ngei tih MZP-in an finfiah pakhat chungah dan anga hmalak a nih theih nan MZP hruaitute chuan nimin khan Home minister K Sapdanga a pisaah hmuin, dan anga hma la turin an ngen a ni.

MZP ngenna angin Home Minister chuan bawhzui nghalin, certi­ficate lem siamtu ni ngeia hriat mi pakhat chu nimin khan police-in an man a ni. Home Minister-in chak taka hma a laknaah an lawm thu MZP chuan an tarlang.

MZP chuan, "Zirlaite'n hun leh thâ tam tak seng­a certificate an sual chhuah laiin, awlsam taka certificate leh document lem hrang hrang kan ram­ah ngampa taka siam a ni hi pawi kan tiin kan dodal tlat a, hetiang thil a awm tawh loh nan chak taka hma la turin Mizoram sorkar kan ngen a, MZP pawhin uluk takin kan en zui zel dawn a ni," an ti.