Document/certificate lem siamtu man a ni

Mizoram police-te chuan document/certificate lem siam ṭhin nia hriat Lalneihpuia (27) s/o Lianchungnunga, South Vanlalphai khua, tuna Chawlhhmun, Aizawla khawsa mek chu October 25, 2024 khan an man.

Mizoram Police tarlan danin, Vaivakawn Police Station chuan October 25, 2024 khan Lalneihpuia, Chawlhhmun (phone no. 8119941667)-in social media-ah certificate/document a siam theih thu a post tih thu an dawng a, an chhui zui nghal. Sub-inspector C Lalremruati leh a hote'n Lalneihpuia chu Vaivakawn PS-ah an hruai nghal a ni.

Lalneihpuia chuan police hmaah, August 2024 aṭangin a mobile phone hmangin certificate lem hrang hrang - HSSLC/HSLC marksheet leh certificate, driving license leh Mizoram University grade card lemte a siam ṭhin a, document pakhatah Rs 2,000 a lak ṭhin thu a puang.

Lalneihpuia lakah hian Vaivakawn PS-ah October 26, 2024 khan Bharatiya Nyaya Sanhita section 336(2) leh 336(3) tlawhchhanin thubuai ziah luh a ni.

Mizoram Police chuan, mi bumna atana educational degree, professional certificate, signature, adt. lem siam leh tihdanglam chu dan bawhchhiatna pawi leh lian tham tak a ni tih an tarlang a, "Mipuite hetiang document dik lo leh inbumna laka fimkhur tur leh hetiang dan bawhchhiatnaa inhnamhnawih lo turin Mizoram Police chuan a chah a ni," an ti.