Sorkarin Special Ration Package a siam dawn - ZPM Vice President

ZPM vice president C Lalnunnema chuan, Mizoram sorkarin Special Ration Package a siam dawn thu leh National Food Security Act-in a huam loh chhungkaw harsate tan ration buhfai kg. khat Rs 20-a lei theihna tur scheme siam a nih dawn thu a sawi.

C Lalnunnema hian Sinlung Hills Council (SHC) inthlan turah campaign-in October 29-30, 2024 khan Sakawrdai, New Vervek leh khaw dang eng emaw zatah thu a sawi a, "Mizoram sorkarin Mizoram State Special Ration Package a siam dawn a, hei hian chhungkua 25,000 a huam ang. Food Security Act-in a huam loh chhungkaw harsate tan buhfai kg. khat Rs 20-a an lei theihna tur scheme siam a ni dawn bawk. ZPM sorkar hian mipui tan hma a la zel dawn a ni," a ti.

ZPM Vice President chuan, ZPM-in nasa taka beih leh sawisel an tawh thu sawiin, "Eptu party-te chuan 'An insawi anga awm lo' tiin min bei mek a, nimahsela, kan policy tam tak kan tihlawhtling chho mek. Party ṭhenkhatte'n thu tling lo hmangin min bei mah se, Pathian leh mipui kan lamah an ṭang tlat a, hei hi kan chakna leh kan thla timuangtu a ni," a ti a; Pathianin ram siamṭhat hna harsa tak takahte a hlawhtlinna a hmuhtir zel thu a sawi.

"Kan hma lawkah Hmar tlangdung hruaitu thlanna hun kan hmang leh dawn a ni a, he hunah hian mipuiten ngaihtuahna fim tak kan sen a tul a, sum leh pai therhlo vang mai mai a kan duhthlanna hmang sual lo turin mipuite ka chah a ni," a ti.

Hmar lam tlangdung mipuite nunphung leh ZPM policy a inmil hle nia sawiin C Lalnunnema chuan, "Handholding Policy hi kan rama kut hnathawktute khai chhuahna tur a ni a, hmar tlangdung mipuite hi kut hnathawha taima leh intodelh tak an ni a, Handholding Scheme hi an dinchhuahpui ngei ka beisei. Sem policy-in mipui rilru lo hruai khawlo tawh mah se, Bana Kaih policy hmang hian kan ram chhan chhuah hna kan thawk mek a ni," a ti a; SHC inthlanah ZPM leh HPC ṭang dun candidate-te thlang tling turin mipui a ngen a ni.