Khauh lehzuala kuhva tawlhrûk do turin Mizoram sorkar ngen

Mizoram Kuhva Chingtu Pawl (MKCP) chuan thuchhuah siamin, khauh leh nasa zawka Myanmar aṭanga kuhva rah lo la lut donaah nasa zawk leh khauh lehzuala hma la turin Mizoram sorkar an ngen.

MKCP chuan, kuhva rah la chhâwngtute'n an khâr chhâwn hun a thleng mek a, mahse, kuhva hralh turin harsatna lian tak an tâwk mek tih an tarlang a, "Tunah hian dan kalha Myanmar lam aṭanga kuhva rah ro leh hring a lo luh avangin Assam lama duty-ah harsatna a thleng ṭhin. Myanmar kuhva leh Mizoram kuhvate duty-te'n an hriat pawlh vek avangin kuhva khârchhâwngte'n an lei ṭha ngam lo a, manganna nasa tak a thleng a ni," an ti.

Mizorama kuhva chíngtute leh Mizo mipuite chu dan loa Myanmar aṭanga kuhva lo lut donaah ṭangrual turin MKCP chuan an ngen a; ram dan kalha kuhva tawlhrûka thila inhnamhnawih lo tur leh an Mizopuite hah taka thawh rah eizawnna tichhetu ni lo turin kuhva tawlhruka inhnamhnawih Mizote an chah bawk.

MKCP chuan, Myanmar aṭanga dan loa kuhva rah tawlh ru ṭhinte laka khauh taka hma la tur sorkar a ding chu thlamuanthlak an tih thu an tarlang a, "Kan sorkar chak tak hi khauh leh nasa zawka Myanmar aṭanga kuhva rah lo la lut reng do kawnga nasa lehzuala hma la turin kan ngen a ni," an ti.

MKCP hi Mizoram Arecanut Growers Association ni ṭhin an ni a, tun hnaiah Mizoram Kuhva Chingtu Pawl tiin hming an thlak a ni.