Khaw 3-ah a thlawna inentirna buatsaih

Adviser to chief minister Dr Lorrain Lalpekliana Chinzah, MLA chuan October 29-30, 2024 khan Sinlung Hills Council (SHC) chhunga khaw pathum - Vanbâwng, Khawlêk leh Làmherh khuaah a thlawna inentirna a buatsaih.

Dr Lorrain Lalpekliana free clinic-ah hian mi ṭhahnem tak an inentir a; Khawlêkah mi 80, Vanbâwngah mi 135 leh Làmherhah mi 70 inentirin, an vaiin mi 285 an inentir a ni. Damdawi mamawhte hnenah a thlâwnin damdawi eng emaw zat an pe bawk.

Dr Lorrain Lalpekliana Chinzah chuan, SHC huam chhunga mipuiin hriselna lamah hmasawnna tur tam tak an neih thu sawiin, "Sorkar hmasa hun laiin ngaihsak in hlawh tâwk lo niin ka hria a, damlo enkawlna tur hmunhma leh hmanraw ṭha bakah, thawktu indaih lohna hian harsatna a thlen niin ka hria. ZPM sorkar hian zirna leh hriselna bakah, kut hnathawktute chawikan a ngai pawimawh hle a, mipui sorkar hnuaiah kawng hrang hrangin tlangdung hmasawnna tur a ngaihtuah zel dawn a ni," a ti.