Dungtlangah Vangpui Kût an hmang

Art & Culture department leh YMA, Dungtlang Branch chuan nimin khan Dungtlangah Cultural Meet leh Vângpui Kût an hmang a, Art & Culture minister C Lalsawivunga'n a hmanpui.

Cultural Meet & Vangpui Kûtah hian Ramhlun North branch YMA leh MHIP-te'n Mizo hnam lâm chi hrang hrang an entir a; Dungtlang leh a ṭhenawm khua - Sesih, Leithûm, Lianpui, Khuangleng, Khuangthing leh Vaphai branch YMA-te leh sikul hrang hrangin hnam làm an entir bawk.

Art & Culture Minister chuan, Dungtlang Vângpui Kût chu Mizo hnam nunphung leh zia vawn himna a nih a thu sawi a, "Mahni hnam zia zahpuite chu hnam dingchhuak an awm ngai lo a, an ral ṭhin," tiin, Kût hmangtute chu Mizo hnam nunphung vawng nunga tihmasawn turin a chah.

Kût hi YMA, Dungtlang Branch president Deny Lalremruata'n a kaihruai a; khualzahawm Laldingliana Sailo, YMA, Ramhlun North Branch president pawhin thu a sawi. Kumin hi Dungtlang khuain Vângpui Kût an hman ṭum 38-na a ni.