KHAWTHLIR

Mei zu mi 4 man

Aizawl District Anti Tobacco Squad chuan nimin khan Khatla veng chhunga sorkar pisa hrang hrang tlawhin, phal lohna hmuna mei zu an awm leh awm loh an enfiah a; dan bawhchhiaa mei zu mi pali manin, pawisa an chawitir. Aizawl District ATS chuan, district hrang hrangah Tobacco Free Youth Campaign 2.0 hman mek a nih thu leh a remchan angin sorkar pisaah meizûk chungchanga dan bawhchhia an awm leh awm loh an enfiah zel dawn thu an tarlang.

PYD General Conference

UPC (North East India) ṭhalai, Pentecostal Youth Department General Conference vawi 46-na chu zanin hian Hnahthial North-II VC Ground-ah ṭan a ni dawn a, UPC NEI general secretary Rev. Lalmalsawma Sailo-in a hawng ang. Inkhawmpui thupui chu 'Thlarau Thianghlim nei rawh u' tih a ni a, naktukah Horeb Conference Hall-ah inkhawmpui rorel neih a ni dawn. Inkhawmpui hi November 3, Pathianni zanah a ṭiak ang.

Sangha man khap

Lunglei District Magistrate chuan thupek siamin, October 10 - December 10, 2024 chhungin Lunglei district-a lui zawng zawngah sangha - nghalim, nghadawl leh léngphár man khap a ni tih a tarlang. Thupek zâwm lote chu dan hmangin thla thum thleng tâng tur leh Rs 5,000 chawi tura hrem theih a ni. Thupek hian autonomous district council a huam tel lo.

Heroin leh Ganja

Assam Rifles sipaite chuan October 29, Thawhlehni khan Champhai Zoteah Thang­lianmanga (39), Champhai hnen aṭangin heroin gram 10.7 leh ganja kg. 8 an man. Ruihhlo leh a neitu hi Cham­phaia END hnenah an hlan a ni.

Zirhona buatsaih

Mizo Academy of Letters Joint Headquarters, Lunglei leh Lunglei College-a Mizo department chuan nimin khan Lungleia Art & Culture department Auditorium-ah 'Lalhmingliana Saiawi thu leh hla zirhona' an buatsaih. Zirhonaah hian sorkar official te, Lalhmingliana Saiawi chhung te, Lunglei College-a zirlaite leh thu leh hlaa tui mite an tel.