Damdawi a man tlawma lei theihna Jan Aushadhi kalpui tan a ni ta

Sorkar laipuia 'Jan Aushadhi' programme anga damdawi a man tlawma zawrh­na dawr, Mizoram sorkarin Aizawl Civil Hospital-a a siam thar aṭangin nimin khan damdawite hralh chhuah ṭan a ni. Vawiin hian official-in a hawnna hun hman a ni ang.

Jan Aushadhi hi Aizawl Civil Hospital (ACH) main building kawtah siam a ni a, Health department-a pharmacist-te enpuina hnuaiah damdawite chu hralh chhuah a ni.

Vanglaini palai zawhna chhangin ACH medical superintendent Dr Rosangluaia chuan, damdawi man a tlawm theih chhan chu damdawi siamtu company aṭanga lei a nih vang a nih thu a sawi a; lei turin Mizoram State Health Care Society-te'n a siamtu company-te chu thu­thlung (memorandum of understanding) an ziahpui thu a sawi.

Dr Rosangluaia chuan, "Damdawi siamtu company-te hian mipui lei turin direct-in an zuar chhuak meuh lo a, market-a zuar chhuaktu company an awm a, chung mite chuan a siamtute aṭangin an lei a, an duh angin a bâwm leh káwrte an siam ṭhin a, chu chuan damdawi man pawh a tisang ṭhin. Market tu kaltlang loa damdawi siamtu company aṭanga lei a nih avangin a tlawm thei a ni," a ti.

Dr Rosangluaia chuan, Jan Aushadhi-a damdawi zawrhte chu damdawi ṭha pangngai vek an nih thu leh pharmacist enpuina hnuaia zawrh a nih thu a sawi a, "Hlâwkna beiseia zawrh a ni lo a, mipui vantlang tan liau liaua siam a ni. An hralh chhuahnaa sum hmuh hmangin an inenkawl thei tawk vel mai thei," a ti.

Thu dawn danin, generic drug an tihte zawrhna dawr siam tur hian Mizoram sorkar chuan Health Care Society hnuaiah pawisa a dah a, chumi hmang chuan hmalak a ni. Damdawi zawrhte chu dawr pangngai aiin a tlawm hle a, damdawi ṭhen­khatah phei chuan 80% velin a tlawm zawk niin an sawi.

Mizoram State Health Care Society enkawltu Dr C Lalthanpara chuan, Jan Aushadhi-a a bul tumtu chu Ministry of Chemical & Fertilizers hnuaia Bureau of Pharma Public Sector Undertaking of India (BPPI) a ni tih a sawi.

Dr Lalthanpara sawi danin BPPI chuan damdawi siamtu - Indian Drugs and Pharmaceutical Ltd., West Bengal, Karnataka Antibiotics leh Rajasthan Drugs & Pharma Ltd.-te an thawhpui a, "Anni hian damdawi man tlawm, generic drugs hi an supply a, damdawite chu National Accreditation Board of Laboratories-ah endik phawt zel a ni," a ti.