KHAWTHLIR

HSSLC result
MBSE chuan Higher Secondary School Leaving Certificate Examination 2015 result chu vawiin hian a tichhuak dawn. Result hi Chaltlanga MBSE office-ah leh MBSE website www.mbse.edu.in ah en theih a ni ang a, result bu Rs. 100 man lei tur a awm bawk ang.

DIG hna zawm
Mizoram sorkar chuan Joseph Lalchhuana, IPS chu DIG (Southern Range)-ah a dah thar a, nimin khan a hna thar hi a zawm.

Lehkhabu tlangzarh
INTACH, Mizoram Chapter buatsaih, 'Built Heritage of Mizoram' tih chu nimin khan IPR Auditorium-ah chief minister Lal Thanhawla'n a tlangzarh. Chief Minister chuan, pipute aṭanga thil hlu rochunte chu chhuan lo kal leh zel turte tan zir tur leh hriat tur pawimawh an nih thu a sawi.

Chaw nghei tan
Lungleia Sikul Ṭan Hma Duh Lo Pawl invuahte chuan, zing dar 8-a sikul ṭan duh loh vangin nimin tlai aṭang khan tiam chin awm loin Lungleia MSU regional headquarters offi­ce-ah chaw an nghei ṭan. Chaw ngheite hi mi 30 vel an nia thu dawn a ni.

BHSS-in lawmpui
Baptist Higher Secondary School, Serkawn chuan nimin khan an sikula Tucker Hall-ah an sikul aṭanga kumin HSLC-a pakhatna Jennifer Vanrammawii leh pathumna C Lalnun­feli-te bakah, zirlai hlawh­tling zawng zawng­te lawmpuina leh chawi­mawina hun an hmang a, parliamentary secretary (School Education) Joseph Lal­himpuia'n a hmanpui.

Current-in man hlum
May 6, 2015 zan dar 7:45 vel khan Lawmsangpuii (14) d/o Zatluanga (L), Phuldungsei khua chu electric current-in a man a, a hliam tuar loin a thi. Thu dawn danin, Lawmsangpuii hian an ṭhenawmte ina current leak awm a khawih fuh palh a, a hnu lawkah a thi a ni.

ZNP-in lawmpui
ZNP ṭhalaite chuan thuchhuah siamin, India rama football inelna sang ber I-League khel tura Aizawl FC a in­hlángkai chu an lawmpui thu leh an chhuan tak zet thu an tarlang.