Health Minister-in doctor zahawmna Hralh lo turin sorkar doctor-te a chah

Mizoram Government Doctors' Association (MGDA) chuan nimin khan Aijal Club-ah General Conference an hmang a; khuallian, Health minister Lal Thanzara chuan thu sawiin, doctor-te chu sorkar hna dah pawimawh hmasa ṭhin tur leh doctor hna zahawmna hralhtu ni lo turin a chah.

MGDA conference hi MGDA vice president Dr Rohmingthanga Ralte-in a kaihruai a; minister Lal Thanzara chuan, "Ram a ṭhang zel a, private hospital leh clinic a tam chho zel hi a lawmawm hle, sorkar pawh a chhâwk viau a ni. Private hospital leh sorkar damdawi-ina thawk kawp tam tak in awm a, sorkara in thawh duh tak tak chuan sorkar hna dah pawimawh hmasa turin ka ngen che u a ni," a ti.

Lal Thanzara chuan, "Doctor tam tak chu company-te nen inthurualin, damlote endikna chi hrang hrangah leh an mamawh loh damdawi an chawh ṭeuh ṭeuh a, lawmmanah laptop/tablet leh thil dang an la ṭhin ni anga sawi awm hi a ṭha lo tak zet a ni," a ti a; doctor hna chu hna zahawm a nihna hralhtu ni lo turin sorkar doctor-te a chah.

Ram mipuite hriselna atan sor­karin kawng hrang hrangin hma a la reng tih sawiin, Health Minister chuan, "Hmalak mek a nih lai hian harsatnate pawh a awm fo. Health department-in hmingchhiatnate tâwk fo mah se, doctor fel leh ṭha­hnemngaite zarah hma kan sawn zel a ni," a ti.

MGDA conference-ah hian an member pension-a chhuakte thlahna hun leh nunna chánte sûnna hun an hmang. Chawhnu­ah MJA kaihhruainain hruaitu thar an thlang a; president-ah Dr C Lalhrekima, vice president-ah Dr Chawngthanchhunga, general secretary-ah Dr C Lalchhandama, assistant general secretary-ah Dr T Lalzawmliana leh treasurer-ah Dr Lalthanpuii te an thlang.

Health Minister-in sorkar hmalakna a sawi:
NHM hnuaia doctor-te lawmman tihpun a ni dawn a, hard area-a awmte'n Rs. 80,000 + 40,000 leh very hard area-a awmte'n Rs. 1,00,000 + 40,000 an dawng ang.
Cheng nuai 980 senga Saiha Distric Hospital sak ṭhatna tur bul ṭan tawh a ni.
Kulikawna Mental Hospital leh Lawngtlai District Hospital sak ṭan thuai beisei a ni.
Thenzawla AYUSH Hospital, khum 50 awmna tur building peih ṭep tawh a ni.
Falkawna H1N1 Isolation-cum-ICU leh Multi-Sisciplinary Research Unit peih thuai beisei a ni.
Zemabawka Tertiary Cancer Care Centre (TCCC)-ah state danga cancer-te zai theihna ang chi awm theihna tur building cheng vbc. 45 hmanga sak thuai a ni dawn.
Aizawl Civil Hospital main building kawtah damdawi tlâwm zawka zawrh ṭan a ni.