PYKKA hnuaiah khaw tinah Rs. 1,00,000 pe hman

8th May, 2015

Mizoram State Sports Council (MSSC) chuan kum 2008 aṭanga 2014 thlenga Panchayat Yuva Krida Aur Khel Abhiyan (PYKKA) a kalpui chhungin Mizoram khaw tin hnenah Rs. 1,00,000 ṭheuh a pe a; kum tin PYKKA tournament an buatsaih kim bakah, national level inelnaah an tel kim thei.

Vanglaini palai zawhna chhangin MSSC secretary C Laltlanthanga chuan, PYKKA kalpui a nih chhungin Mizoram chu India rama kalpui ṭha ber pawl a nih thu a sawi a, "State tam zawkin 75% vel achievement an neih laiin, 100% achievement kan nei. Kan tihṭhat avangin PYKKA thlaktu RGVY-a General Council-ah pawh state chief secretary panga tel zingah Mizoram chief secretary a tel a ni," a ti.

C Laltlanthanga chuan, Mizorama PYKKA kalpui a nih chhungin V/C nei chin khaw tinah Rs. 1,00,000 ṭheuh leh Rural Development (RD) block tinah Rs. 5,00,000 ṭheuh an pe tih a sawi a, "Hna kan thawh ṭhat avangin sum pawh min pe chak a, eng lai pawhin top 5-ah kan awm," a ti.

MSSC Secretary sawi danin, PYKKA hnuaiah hian RD block, district leh state level-ah kum tin tournament an buatsaih kim a; national level tournament-ah an tel kim theii. PYKKA hnuaiah vek hian Kawnpui Hockey Academy-ah leh Champhai Chhangphut Field-ah artificial turf an phah a, Rajiv Gandhi Stadium bulah leh Lunglei Sazaikawnah multipurpose hall lian an sa mek bawk.

PYKKA hi kum 2014-ah tihtawp niin, Rajiv Gandhi Khel Abhiyan (RGKY) siam thar a ni thung a; RGKY hnuaia hna thawh turah chuan Central lamin national tender a chhuah vek dawn a, sum chu DoNER Ministry kaltlanga pek tur a ni.

C Laltlanthanga chuan, kum thum chhunga RGKY kalpuina turin cheng nuai 720 ruahman a nih thu sawiin, sum erawh an la hmuh lo a, "RGKY hi RD block pakuaah kalpui phawt tur niin, kalpuina tur RD block pakuate pawh thlan tawh a ni a, RD tinte chu cheng nuai 160 pek vek tur a ni," a ti a; sum hmuhna tur dang pawh a awm thu a sawi.

Zawhna chhangin MSSC Secretary chuan, Mizorama sports association zingah chak tak tak an awm laiin, hma la ṭha lote pawh an awm ve nual thu a sawi a, "Kan association hruaitute hi an chak a ngai a, India rama sport association chak ni pha tura an ṭan a ngai. An player-te páwng nawr vak leh dem tur a ni lo a, hruaitu an chak chuan player-te an ṭha mai a ni," a ti.

PYKKA leh RGKY-te hi sorkar laipuiin thingtlang naupang leh ṭhalaite infiamna lama hma an sawnna tur leh thingtlanga infiammi talent nei ṭhate zawn chhuahna tura a duan a ni.