Trade Expo tihtawptir chhan sawifiah

Mizoram Merchant Association (MIMA) hruaitute chuan nimin khan Aizawl Press Club-ah thuthar thehdarhtute an kâwm a; 3rd International NE Trade Expo, 2015 titawp tura an ngen chhante an puang a, Aizawl DC-in a tihtawptir avangin an lawm hle tih an sawi.

MIMA president PC Laldinthara chuan, Expo buatsaihtu Ranjan B Gohain chuan trade licence a neih loh avangin MIMA-in titawp tura an ngen thu a sawi a, "Trade licence an nei lo tih report kan dawn avangin an document kan dil a, a fel loh avangin titawp turin kan ngen a ni. An dawr kan kharsak lo a, anmahni dawr turte dawr lo turin kan ngen mai a ni," a ti a; trade licence an nei lo tih chu Central YMA hruaitu aṭanga an hriat thu a sawi.

PC Laldinthara chuan Mizo zingah dan loa sumdawng lo ṭanpui a, lo thurualpui duh an awm bakah, phalna nei lo tih pawh hre chunga hnamdang thawhpui duh an awm nia sawiin, pawi an tih thu a sawi a, "Mizo pa dik tak, dikna ṭana ding tlat officer ṭhenkhat kan la nei hi kan chhuang takzet a ni. Mizo mipuite kan ram tan lungrual taka ke pen turin kan ngen a ni," a ti.

MIMA-in Ranjan B Gohain-a licence neih nia an sawite:

• AMC aṭanga licence a neih hi banner tar phalna chiah a ni. Chu pawh Ranjan B Gohain emaw NE Trade Expo tan ni loin, Paotinlal Gante of Buanga's Business atana pek a ni.

• E&F aṭanga phalna a neih chu 'Say No to Plastic and Yes to Bio-Degraddable Bags' puanzar phalna leh tarlan phalna a ni.

• Assam Rifle hotuten sumdawnn phalna atan an pe lo a, 'Ground is not to be used for commercial purpose' tih pawh a awm.

• Taxation aṭangin Entry of Vehicles for 3rd Internation NE Trade Expo a ni a, hei hi Mizorama an motor luh phalna a ni.

• DC aṭanga phalna a nei nia a insawi hi April 17, 20, 23 atana aurina hman phalna a ni.