Hna hmawr bàwkna lamah tun aia fet zawka ṭan lak a pawimawh - K Sapdanga
Mizoram Engineering Service Association (MESA) chuan nimin khan Berawtlanga Multipurpose Hall-ah Annual General Conference vawi 43-na an hmang a; DPAR minister K Sapdanga'n hmanpuiin, "Kan thawhrim zia ngaihtuahin, kan hna hmawr bàwkna lamah tun aia fet zawka ṭan kan lak a pawimawh," a ti.
K Sapdanga chuan, engineer-te chu an tih ṭhat aiin an tih ṭhat loh lai a lansarh ṭhin thu a sawi a, "Mipuite'n in chungah beiseina sang tak an nei a, indaih lo chung pawhin in thawh nasat a ngai. Tui pump chhuak tura hna tamzia te, senso hautakziate ngaihtuahin a hmawr bàwkna tui sem chhuah lai hi tun aiin vil ngun ila. Kawng laih hautakzia leh senso tamzia ngaihtuahin, a hmawr bawkna kawng phah mam hnaah engineer-te inrawlh tam ila. Kawlphetha siam chhuak tura a hautakzia ngaihtuahin, a hmawr bawkna connection pek etc.,-te hi tun aiin vil ngun ila. Kan thawhrim dan ngaihtuahin, kan hna hmawr bàwkna lamah tun aia fet zawka tṭan kan lak a pawimawh," a ti a, an thawhrim chhan mipuite'n an chhawr tawk lo deuh nia alan thu a sawiin a lang," a ti a; insawhngheh kum leh inrenchem kalpui a nih mek avanga work department lamah harsatna awm chu pawi a tih thu a sawi.
Sorkar tharin kalphung thara hna thawh a tumnaah engineering department-te chu kawngro su ber tur an nih thu sawiin Sapdanga chuan, "Hmasawnna hna langsar zawng zawng chu engineering department sulhnu deuh vek a ni. PWD-a engineering officer-te'n thlarau MR surender vangin thla khatah cheng nuai 15 lai in lo hum (save) thei tih kan hre ru a, a lawmawm hle mai," a ti a; mipui khawsak awlsam zawkna tur leh per capita income a pun zel theih nan ṭan la zel turin engineer-te a chah.
MESA inkhawmpuiah hian chawhmaah rorel inkhawm neih a ni a; sorkar policy tihlawhtling turin theihtawpa sorkar ṭawiawm ṭha an ti a, a bikin engineering work-ah theihtawp chhuah turin member-te an inngen.
Tun hnaia sorkar notification chhuakah non-work department tana engineering work thawh ve theih tura tih a nih chu ṭha lo an ti a; notification ennawn a, hnûk kîr turin sorkar ngen an rel.