Excise-in January - October 2024 chhungin heroin kg. 39.018 an man

Excise & Narcotics department (END) chuan kumin January-October chhungin zu chi hrang hrang litre 59,478.435 leh ûm 25,947 leh, heroin kg. 39.018 an man.

END-in nimina END Commissionerate conference hall-a Case Review Meeting an neiha tarlan danin, END hian kumina thla 10 chhungin heroin kg. 39.018, methamphetamine kg. 122.435 leh ganja kg. 561.725 bakah, damdawi ruih theih chi hrang hrang panga an man a ni.

January-October, 2024 chhung vekin END chuan zu chi hrang hrang litre 59,478.435 leh ûm 25,947 an man a; rakzu litre 56,207.095 leh Myanmar zu BEDC lt. 3,271.340 te, sapzu (IMFL) ûm chi hrang hrang ûm 25,947-te a ni. Zu bilh lai ṭîn 1,00,821, dawidim kg. 116.577 leh, beer ûm 162 leh bûr 25,750 an man bawk.

Nimina END Case Review Meeting hi commissioner Z Lalhmangaiha'n a kaihruai a, district hrang hranga assistant commissioner leh officer-in-charge-te an tel. kumin 2024-a January-October chhunga hmalakna te, zu leh ruihhlo leh a neitute a man dante an thlir let a ni.

END hotute chuan, Krismas leh kumthar lo thleng tur chu Mizoram mipuiin him leh thlamuang taka an hman theih nan Mizorama zu leh ruihhlo khuahkhirhnaa hmalak dan tur an duang a; zu leh ruihhlo chunghanga dan leh thupekte khauh zawka kenkawh an rêl a ni.