Ration card sen a awm dawn - FCSCA Minister

Serchhip khawpuia in tinah eirawngbawlna gas dah (home deliver) a ni tawh a, hei hi nimin khan Serchhip District Consumer Association buatsaihin DC hall-ah lawm a ni. Khuallian Food, Civil Supplies & Consumer Affairs (FCSCA) minister B Lalchhanzova chuan, ration card pâwl leh enga leng lote tan a man tlawma buhfai lakna tur ration card sen siam a nih dawn thu a sawi.

FCSCA Minister chuan, ration card ennawn mek a nih thu sawiin, "A buaipuitute lam aṭang chuan na deuh taka hmalak kan tum a, card pawl leh card enga awm àwm tak, mahse, a awm thei chin bitukin a pelh tawh si avanga leng lo eng emaw zat an awm a, chuvang chuan mi 1,00,000-te tan kg khat Rs 20-a ration buhfai an khul theihna tur Special Ration Package buatsaih a ni a, hemi atan hian ration card sen hman a nih ang," a ti.

B Lalchhanzova chuan, Aizawlah home delivery kalpui hleih theih a nih loh laia Serchhip khawpuiah kalpui vek theih a ni chu ropui a tih thu a sawi a; mi tinte chu ram tan ro hlu an nih thu leh ṭanrualna chu Serchhip district leh ram hmasawnna ataan ṭangkai a nih thu a sawi.

Supply Minister chuan, kal khawmte chu tute emaw tal tan ṭangkai nih tum ṭheuh turin a chah a, "Kan koa tla kan mawhphurhnate ṭha taka kan hlen ṭheuh a ṭul," a ti a; FCSCA department-in consumer association-te thawhpui zel a duh thu a sawi bawk.

Tarlan danin, Serchhip P&E Vengah kum 2022 aṭangin gas home delivery kalpui ṭan a ni a, tunah chuan Serchhipa veng hrang hrang 17-ah kalpui vek a ni tawh; Serchhipa gas agency chu MIZOFED a ni.