Congress sorkar laiin AR insawn chhuah tur kan bawhzui - Thanzara

Mizoram Pradesh Congress Committee (MPCC) president Lal Thanzara chuan, Congress sorkar laiin Aizawl aṭanga Assam Rifles insawn chhuah tur an bawhzui thu leh, Congress an sorkar leh a nih chuan BPL awm lohna state ni turin theihtawpa an beih dawn thu a sawi.

Nimina Congress Bhavan-a political sesson-ah Lal Thanzara chuan, "Pathian ṭanpuina azarah Congress kan sorkar leh chuan BPL awm lohna state ni turin theihtawpin kan bei dawn a ni," a ti.

Lal Thanzara chuan, AR insawn chhuah tur chungchangah Chief Minister-in tun hnaiah chanchinbumite hmaah a sawi tih a sawi a, "AR-te hi Congress sorkar lai khan PM Rajiv Gandhi chuan an insawn chhuah tur thu a lo puang tawh a, Congress sorkar pawhin a lo bawhzui zel a ni," tiin a sawi.

MPCC President chuan, Aizawl aṭanga AR insawnna tur chungchangah AR hotute leh CM enkawl GAD hotute'n inremna an ziak nia a lan thu sawiin, "An chhuahsan ní tur pawh intihder ní, Arpril 1-ah an chhuak dawn niin an sawi. AR-te hi Home Ministry hnuaia awm an ni a, Home department hi a meizang hlaptu tur an ni. Home department-a officer-te an hawihai a, sawi tur an hre lo," a ti.

Lal Thanzara chuan, sorkarin Handholding Policy hnuaiah hma an lakna tura an vauchher berte chu prime minister Narendra Modi leh PM hlui Manmohan Singh-a hun laia bul ṭan tawh central-a scheme awm sate a nih thu a sawi a, "Bána Kaih hi intiamkamna harsa tak hnuaia kalpui tur a ni a, lehkhathiam tan chauh a ni a, lehkhathiam lo tan beisei tur a awm lo," a ti a; NLUP-ah chuan lehkhathiam lo pawh an tel a, chhungkaw 1,31,940 hnenah cheng nuai khat aia tlem lo ṭanpui pek a nih thu a sawi.

MPCC President chuan, Congress party chauh lai ber leh chhiat lai ber ni mah se, Pathian malsawm tlaka hma an lak chuan mi chak huaisen dinhmunah Pathianin a hlânkai dawn thu a sawi bawk.