KHAWTHLIR

CS lailâwk

Mizoram chief secretary Dr Renu Sharma chu October 2024 thla tawp khan sorkar hna aṭangin superanuation pension-in a chhuak. Ministry of Home Affairs-in Mizoram chief secretary tur a la ruat loh avangin Mizoram sorkar chuan chief secretary mawhphurhna chelh lailâwk turin H Lalengmawia, IAS a ruat. H Lalengmawia hi MCS aṭanga IAS-a kai a ni a, 2005 batch a ni.

Kawlphetha awm dawn lo

Power & Electricity department chuan vawiin hian 132kV Sub-Station, Bukpuiah Krismas lo thleng tur inbuatsaihna atan hna an thawk dawn a, hei vang hian chawhma dar 10 aṭanga tlai dar 3 thleng 132kV Sub Station Bukpuiin a châwm khuate'n kawlphetha an hmu dawn lo. Serchhip Power Division Executive Engineer chuan mipui hriatthiamna a ngen a ni.

Vuah turin hriattir

Lawngtlai district transport officer Margaret J Vanlalremmawii chuan, January 1, 2019-a Lawngtlai district-a mihring phur sumdawnna lirthei (two wheeler leh autorickshaw huam loin)-te chu Transport department, Notification no.B.13011/4/2022-TRP Dt.3.10.2024-in a tarlan angin, thla ruk chhungin an lirtheiah vehicle location tracking (VLT) device leh emergency button vuah vek turin a hriattir.

MSSA conference

Mizoram Stenographers’ Service Association (MSSA) chuan nimin khan IPR conference hall Lianchhiari Rûnah Annual Conference vawi 49-na an hmang. MSSA-ah hian member 200 an awm mek a ni.

CM-in hmanpui

Zo Inspiration Foundation chuan nimin khan Verdant Multipurpose Hall-ah vehbûr khawn hmanga mi an ṭanpuite nena intawhkhawmna an buatsaih a, chief minister Lalduhoma'n a hmanpui. Tarlan danin, Zo Inspiration hi June 7, 2020-ah din a ni a, ṭum 85 vehbûr khawn tawhin, cheng nuai 300 chuang an hmu tawh. An sum dawn hmangin in sak/cheiṭhat 18, mi harsa eizawnna tur eichawp dawr pathum, zirlai sponsor 26 leh thilpek eng emaw zat an pe tawh a ni.