Sum dinhmun leh mamawh dan enin LMC-a post 29 zinga 18 hnawhkhah rel

Lunglei Municipal Council (LMC) Board of Councillors (BoC) chu nimin khan an chairman Lalzuithanga kaihhruaiin BoC Hall-ah an ṭhukhawm. Mizoram sorkarin LMC tana sanction post 29 hnawhkhah phalna a pek tawh chu sum dinhmun leh mamawh dan enin 18 hnawh khah phawt an rêl.

LMC BoC ṭhutkhawmah hian Mizoram sorkarin LMC tana sanction post 29 hnawhkhah phalna a pek tawh chu LMC budget awm sa aṭanga hlawh pek tur a nih dawn avangin sum dinhmunin a tlin tawk leh mamawh hmasa zual hnawhkhat tura hma lak phawt ni se, an ti.

Post 29 zinga hnawhkhat turin Mizoram Public Service Commission kaltlanga lak ngai hna chi hrang palia post panga leh Municipal Service Selection Board (MSSB) kaltlanga lak theih zingah casual employee angin skilled pariat leh unskilled panga lak an rel a ni.

Lunglei khawpuiah man tlawm zawka mipui an veivah theih nan bus tlantir tura hmalak ṭha an ti a; chutih rualin, LMC sum awm sa aṭanga hmalak theih a nih dawn loh avangin state sorkarah a remchan dana bawhzui ni se, an ti.

BoC-a tarlan danin, Lunglei khawpui kawngpui kama in sakna bungrua emaw, bungrua eng chi pawh dah dilna pali a lut tawh a, darkar 24 aia rei lo dah phalna pek an ni. June 25, 2024 khan LMC leh LMC area-a local council-te'n Lunglei khawpui chhungah mipui leh lirthei che vel him zawk nan leh garage nei lote felfai zawka enkawl an nih theih nan vantlang hmun leh kawng kama lirthei hûn dan ruahmanna siam turin thawh dunna thuthlung (Memorandum of Understanding) an ziak a, hmalak mek a ni.