Sorkarin mipui min sáwr fû mek - MNF Vice President

Legislative Assembly-a opposition leader leh MNF vice president Lalchhandama Ralte chu Sinlung Hills Council inthlan awm tur atan campaign-in Tuivawl bial a fang a, khaw hrang hrangah thu sawiin, Mizoram sorkarin mipuite duat em em anga insawi reng chungin mipui an sáwr fû mek niin a sawi.

Lalchhandama Ralte chuan, Mizoram sorkar hrawnin beiseina sang tak mipui a neihtir tih sawiin, "Mipuite min duat êm êm anga insawi reng siin mipui min sáwr fû mek. Buhfai man sang takin an tipung a, chhiah hrang hrang an tisang a, hmangaihna mak tak chu a ni. An insawi loh ang zela awm hi kalphung thar chu a ni ber àwm e," a ti.

SHC inthlanah an party worker-te leh neutral-te'n MNF an thláwp leh ngei dawn tih a hriat theih nia sawiin Lalchhandama chuan, "A thlamuanthlâk hle. Tuivawl bial chhung bial parukah hi a vai hian kan lâk vek theih ka ring tlat. Chalfilh bial lamah bial pali-ah bial hnih tal, Serlui bial lamah bial hnihah bial khat tal, a vaiin bial kua tal la turin kan inbuatsaih mek," a ti a; ṭan an lâk zel a ṭûl thu a sawi.

MNF Vice President chhuan, "Pathian leh mipui zarah tun inthlanah hian kan sorkar dawn a ni tih ka sawi duh. Council budget kan neih te, development fund kan neih te, engkim mai dik takin kan hmang ang a, Council sorkar nghet leh mumal tak, hna thawk thei kan din dawn a ni," a ti a; SHC mipuite chu an huam chhûng hmangaihtu tak tak ngaihtuah a, vote hmanga duhthlanna dik siam turin mipui a chah a ni.